– Boazodolliin leat garra árgabeaivvit, ja danin ferte ealáhus oažžut buoret čálgoortnegiid, nu go ovdamearkka dihtii, sadjásaččaid luopmoáigái, friddjaáigge- ja buozalmasvuođa oktavuođas, nu go eanadoalus gávdnojit, lohká sámediggeráđđi Silje Karine Muotka.
– Boazodolliin leat garra árgabeaivvit, ja danin ferte ealáhus oažžut buoret čálgoortnegiid, nu go ovdamearkka dihtii, sadjásaččaid luopmoáigái, friddjaáigge- ja buozalmasvuođa oktavuođas, nu go eanadoalus gávdnojit, lohká sámediggeráđđi Silje Karine Muotka.
Sámediggi čállá preassadieđáhusastis ahte diet leat oasit Sámediggeráđi gulaskuddancealkámušas boazodoallošiehtadussii.
Sámediggi bivdá maid áššebeliid vuoruhit čuovvovaččat dán jagi šiehtadusain; váikkuhangaskaomiid mat dorjot kultuvrralaš ceavzilvuođa, boazodoalu areálvuođusihkkarastima, rekruterema, dásseárvvu ja ekonomalaš ovdáneami.
Ášši meannuduvvo dievasčoahkkimis juovlamánu.
Sihkkarastit guohtoneatnamiid
Boazodoalu guohtoneatnamiid sisabahkkemiid lassáneapmi ja eiseválddiid konsulterengeatnegasvuohta leat mielddisbuktán eanet gažaldagaid ja vuordámušaid boazodoalloorgánaide buktit gulaskuddancealkámušaid, ja maiddái searvat čoahkkimiidda ja seaguhuvvot konsulterenproseassaide.
– Danin lea dehálaš nannet ealáhusa bargonávccaid ja gelbbolašvuođa, nu ahte sis lea duohta mielváikkuhanfápmu ja sáhttet konsulteret áššiid birra mat sáhttet čuohcat sidjiide njuolga, earenoamážit areálaáššiin, lohká sámediggeráđđi Silje Karine Muotka preassadieđáhusastis.
(Ášši joatká gova vuolábealde)
Dárbbašlaš nannet
– Jus boazodoallu galgá buoremus lági mielde sáhttit dustet dáid lassi hástalusaid, de lea dárbu veahkehit orohagaid ruđalaččat. Stáhtas lea stuora ovddasvástádus sihkkarastit ahte boazodoalus leat doarvái gaskaoamit sáhttit vára váldit iežaset rollas buori ládje, lohká Muotka.
Ekonomalaš ovdáneapmi
Boazodoalus leat eanemus golut vuojániidda ja daid áimmahuššamii.
– Sihke ealáhus ja Sámediggi lea máŋgii ovddidan gáibádusa oažžut vuoliduvvot divadiid mohtorfievrruin ja doaibmarusttegiin mat dál gohčoduvvojit personvuojániin. Láhkii fertejit boahtit rievdadusat nu ahte lea vejolaš oažžut ealáhusolggosgollun ovttagearddedivada, lasseárvodivada ja boaldámušdivada, lohká Muotka. Boazodoalus ja eanadoalus fertejit leat seammalágan divatortnegat, lohká Muotka.
Váikkuheapmi šiehtadussii
Sámediggi buktá jahkásaččat cealkámuša boazodoallošiehtadussii, muhto stáhta ii čuovvol cealkámušaid buriin vugiin ovdal šiehtadallamiid. Sámediggi bivdá danin konsultašuvnnaid Eanadoallo- ja biebmodepartemeanttain stáhta fálaldaga birra ovdal boazodoallošiehtadallamiid, dan birra guđe guvlui boahtte šiehtadusa sisdoallu hábmejuvvo.
– Boazodoallošiehtadus lea dehálaš ealáhussii, ja danin sávvá Sámediggi ahte oažžu eanet váikkuhanvejolašvuođa bargui mii dahkko boazodoalu ovdáneami oktavuođas, ja rámmaeavttuid birra maid stáhtalaš eiseválddit fállet, loahpaha Silje Karine Muotka.
