Ovddádusbellodat bivdá ráđđehusa čađahit njuolggadusnuppástusa vai diimmá báhčingeahččaleamit gustojit dán jagi lohppii.
Stuorradiggeáirras Terje Halleland (Ovddádusbellodat) dadjá ahte koronadilli sáhttá dagahit ahte čuohcá bivdoáigodahkii jus olbmot eai beasa čađahit báhčingeahččaleami njoammundilálašvuođa dihte.
Giddejuvvon báhčinšiljut dagahit ahte lea váttis čađahit báhčingeahččaleami go bivdojahki álgá cuoŋománu 1. beaivvi, dieđihii Birasdirektoráhtta loahpas njukčamánu.
– Olusiidda lea bivdoáigodat dehálaš. Muhto go njoammundilálašvuohta dagaha dán jagáš báhčingeahččaleamiid veadjemeahttumin čađahit, de ferte ráđđehus dakkaviđe čađahit njuolggadusnuppástusa ja geahččat makkár rievdadusaid sáhttet bargat, vai bivdoáigodat doaibmá nu movt dábálaččat, dadjá Halleland.
Halleland gáibida diehttevašvuođa ja jođánis čielggadeami bivdiid ovddas, dan váste vai bivddu sáhttá čađahit.
(©NTB)
