Norgga beal Sámis lágiduvvojit njoarostangilvvut eará valáštallamiid oktavuođas. Dát gilvvut eai heive buohkaid, danin leat sápmelaš nuorat áŋgiruššagoahtán lágidit áibbas sierra njoarostangilvvuid mat galggašedje geasuhit olu berošteddjiid.
Norgga beal Sámis lágiduvvojit njoarostangilvvut eará valáštallamiid oktavuođas. Dát gilvvut eai heive buohkaid, danin leat sápmelaš nuorat áŋgiruššagoahtán lágidit áibbas sierra njoarostangilvvuid mat galggašedje geasuhit olu berošteddjiid.
Mannan vahkkoloahpa searvvai njoarosteaddji Lemet Áslat Eira njoarostangilvvuide Tankavaaris Suomas. Gilvvut leat dušše njoarosteddjiid várás, eai ge lágiduvvo eará valáštallamiid oktavuođas. Norgga beal Sámis lágidit heargevuoddjiimiid oktavuođas njoarostangilvvuid ja Sámi valáštallanlihttu (SVL) gilvvuin galget njoarosteaddjit maiddái searvat čuoigamiidda dahje viehkamiidda.
– Tankavaaris in vuoitán ja dál šattan guhká vuordit boahtte gilvvu. Mii galggašeimmet Norgga beal Sámis lágidit njoarostan cup:a. Jáhkkán dása livččii stuora beroštupmi, go eai hal buohkat leat riegádan čuoigin, lohká Eira.
Vuorkágovva: Nils Johan Vars
Nuorat áŋgiruššet
Eira ii vuoitán Tankavaaris ja gártá danin vuordit guhká boahtte buhtes njoarostangilvvuid. Son áŋgiruššá heargevuoddjin gilvvuid oktavuođas maiddái njoarostangilvvuin, muhto lohká ahte dát njoarostallamat dušše geasuhit sin geat oasálastet dahje áŋgiruššet heargevuodjimis. Kárášjohkalaš ja eará sámi nuorat leat danin plánen bargagoahtit ásahit sierra njoarostangilvvuid.
– Mis leat olu jurdagat, njoarostangilvvut sáhttet vaikke man láhkai lágiduvvot. Tankavaaris lihkada čoarvi, ja dat lea oalle somá go lean veahá dolkan dušše soahppi njoarostallat. Buvrovuonas ges leat vihtta čoarvvi ja lea mearriduvvon ahte galggat gaskamuš čoarvvi njoarostit. Go buohkat čoahkkanit dán geasi, de beassat háleštit ja gávnnahit mo galgat lágidit gilvvuid, lohká Eira.
Lunddolaš go vuvdet njoarostallama máilbmái
Nuorra áŋgirušši ii leat jurddašan nu olu galggašedje go ásahit sierra lihttu vai čatnat gilvvuid Sámi valáštallanlihttui. Maiddái dán birra áigot ságastallat Buvrovuonas go boazodoalu falit deaivvadit spábbačiekčangilvvuide suoidnemánus.
– Min Facebookjovkui leat oallugat searvan ja ávžžuhan vel eambbo olbmuid áŋgiruššat. Buot sápmelaččain lea oktavuohta njoarosteapmái, ja dáidet geahččalan njoarostit. Mii oahpahit njoarostallama turisttaide ja go vuovdit dán máilbmái lea hui lunddolaš lágidit sierra njoarostangilvvuid, lohká Lemet Áslat Eira.
SVL-N sávvá gilvvuide bures boahtima
SVL-N jahkečoahkkimis leat maiddái ságastallan njoarostallama birra mannan vahkkoloahpa. Jođiheaddji Kåre Olli mielas lea hui buorre go boazosámi nuorat áŋgiruššet ja háliidit gilvalit njoarosteamis.
– In oainne dárbbu ásahit sierra lihttu go mis han leat njoarostangilvvut. Mii áinnas váldit vuostá sin geat háliidit sierra njoarostangilvvuid lágidit, sii leat bures boahtimat SVL-N:i. Lea hui somá go nuorat áŋgiruššet, sis lea buorre vuoigŋa. Njoarosteapmi lea dehálaš árbevierru Sámis ja danin lea lunddolaš ahte servet dáinna bargguin SVL-N:i, lohká Olli.
Vuorkágovva: Astrid Helander
