Sámedikki doaibmi presideanta Mariann Wollmann Magga čállá suoidnemánu 22. beaivvi leat dáhtoniin man ii goassege vajálduhte.
Sámedikki doaibmi presideanta Mariann Wollmann Magga čállá suoidnemánu 22. beaivvi leat dáhtoniin man ii goassege vajálduhte.
Dál leat vássán guhtta jagi dan rájes go terror fallehii Norgga, garrasit ja roavvát.
– Guđa jagi áigi dohppehallui olles álbmot dasa man eará našuvnnat leat ovdal vásihan, terrorii mii roasmmehuhtii ja gottii olusiid. 77 olbmo, eanaš dain nuorat, muhto maiddái buot ahkejuoguin, dušše ja sin bearrašat ja ustibat odne ain váillahit sin garrasit. Dat lei terror mas politihka vuostá, čállá Mariann Wollmann Magga preassadieđáhusas man lea almmuhan odne Sámedikki facebook-siiddus.
– Ožžot go doarvái veahki?
Wollmann Magga, guhte ovddasta Bargiidbellodaga sámedikkeráđis, ja guhte lea doaibmi sámediggepresideanta geassebotta, čállá ahte odne son jurddaša erenoamážit sin birra geat roasmmehuvvo ja traumatiserejuvvojedje, sihke Ráđđehuskvártalas ja Utøyas.
– Máŋgasis leat fysalaš hávit mat eai leat vel sávvon, ja vel eambbosat rahčet psykalaš reakšuvnnaiguin maŋŋil dáid issoras dáhpáhusaid. Ožžot go sii doarvái veahki ja doarjaga, birrasis ja dearvvašvuođasuorggis? Mun dieđán ahte ii buohkaide leat nu álki hállat daid birra maiguin rahčet, čállá son.
Áigu čuovvolit nuoraid dárbbuid
Sii geat ledje Utøyas suoidnemánu 22. beaivvi 2011, áŋgirušše buohkat politihkalaččat.
– Olusat sis ledje sámenuorat geat háliidedje rahčat dan ovdii vai servodat buorrána. Sámedikkeráđđi dovdá erenoamáš ovddasvástádusa sin ovddas, ja mii áigut čuovvolit sin vai ožžot dan dearvvašvuođafálaldaga man dárbbašit maŋŋil Utøya-terrora, čállá Wollmann Magga.
Ohcala muitomearkka oaivegávpogii
Doaibmi sámediggepresideanta čujuha Per Anders Langerød kronihkkii mii almmuhuvvui Aftenpostenis suoidnemánu 20. beaivvi dán jagi.
Langerød lei ieš Utøyas dalle go terror dáhpáhuvai, ja son čállá ahte dál galggašii oaivegávpogii ráhkaduvvot našuvnnalaš muitomearka.
– Mun lean áibbas ovttaoaivilis dasa ahte lea dárbu muitomerkii gos sáhttá moraštit, muittašit ja oahppat dan beaivvi birra go terror fallehii Norgga. Mii dárbbašat oktasaš našuvnnalaš báikkis gosa sáhttit čoahkkanit suoidnemánu 22. beaivvi, gos sáhttit boktit fas dan jurdaga ahte ráhkesvuohta vuoitá vaši badjel. Suoidnemánu 22. beaivi lea dáhton man eat goassege vajálduhte, čállá Mariann Wollmann Magga.
