Ođđa dutkama mielde, man Independent olgoriikkas lea dutkan, boahtá ovdan ahte lea earenoamáš áigi jándoris goas gánniha lohkat eksámenii ja goas gánniha leat logaldallan skuvllas vai fidne eanemus fágalaš máhtu.
Dat dutkkus ákkasstallá ahte skuvla- ja bargobeaivi galggašii álgit veaháš maŋŋel go mii lea dábálaš, go buoremus áigi jándoris studeanttaide oahppat eambbo, lea maŋŋel go dábálaš oahpahus álgá skuvllas.
Ohppet buoremus gaskabeaivve rájes
Dutkamis čájehuvvo ahte studeanttat ohppet buoremusat gaskal diibmu 11 ovdalgaskabeaivvi ja 21.30 eahkes.
– Buoremus áigi beaivvis oahppat studeanttaide, geat leat universitehtaagis, lea maŋŋel go dábálaš logaldallan álgá. Earenoamážit vuosttaš ja nuppi jagi studeanttaide galggašii eambbo maŋŋelgaskabeaivvi ja eahkes oahpahus, lohká Mariah Evans, University of Nevada sosiologiija professor, ja lea okta dutkama čálliin.
Dutkit leat geahččan vuosttaš ja nuppi jagi studeanttaid joavkku University of Nevadas.
Eatnašat lohket iežaset «eahketolmmožin»
Dutkkus čájehii ahte eatnasat kategoriserejedje iežaset «eahketolmmožin» ja dat dábálaš beaivi sis álgá guokte diimmu maŋŋel go boarrásit olbmuin.
Dutkan lea almmuhuvvon Frontiers in Human Neurosciences, ja dat hástalit universitehtaid mearrádusaid álggahit oahpahusa diibmu ovccis ovdalgaskabeaivvi, danne go dat «ráddje studeanttaid olahusa».
Čoavddus lea: Ale bija alárpma telefuvnnas dušše dan dihte vai lihkat earenoamáš árrat, čállá Independent.
