Guovdageainnu suohkana ovdagoddi áiggošii Čuonjáluotta viessosajiid juohkit fitnodagaide mat rámbuvrra áigot álggahit. Dál fertejit iskat sáhttet go dan dahkat.
Guovdageainnu suohkana ovdagoddi áiggošii Čuonjáluotta viessosajiid juohkit fitnodagaide mat rámbuvrra áigot álggahit. Dál fertejit iskat sáhttet go dan dahkat.
Čuonjáluodda lea ássanguovlu davágeahčen Guovdageainnu márkanbáikki, riikaluotta 93 bálddas. Dan ássanguvlui ledje dál boahtán golbma viessosadjeohcama, maid Guovdageainnu ovdagoddi galggai meannudit odne. Áššit maŋiduvvojedje go ovdagoddi ferte háhkat eambbo dieđuid ášši birra, ja movt sii sáhttet daid meannudit.
Várrejuvvon ealáhusdoaimmaide
Čuonjáluodda lea várrejuvvon viesuide gos sihke orrot olbmot ja seammás lea ealáhusdoaibma. Doppe leat golbma guoros viessosaji. Dál leat guovttis ohcan viessosaji ealáhusdoibmii. Okta lea ohcan geavahanrievdadeami, ja áigu cegget dušše ásodatviesu, ja su ohcan hilgojuvvui.
Bargiidbellodaga áirras Inger Marit Bongo hástalii ovdagotti árvvoštallat galgá go suohkan juohkit ealáhusviessosaji guovdu márkana, go ii leat čielggas makkár ealáhusdoaibma doppe galgá.
– Ovdagottis lea ealáhuslávdegoddi, ja mis lea servodatovddasvástádus, ja mis lea bargu sihkkarastit ahte várrejuvvon guvlui bohtet ealáhusdoaimmat. Jáhkán boahtteáiggis mis galget čielga ealáhussajit ja čielga orrunsajit, go márkanguovddážis eai galggaše sehkkejuvvon viessosajit, lohká Bongo Ávvirii.
Rámbuvrrat Čuonjáluddii
Inger Marit Bongo oaččui doarjaga olles ovdagottis, ja šattai ovttaoaivilvuohta ahte Čuonjáluottas galggaše eanas rámbuvrrat, eai ge eará ealáhusdoaimmat. Dat lea juste dan buori saji dihte, go lea riikageainnu jur bálddas, ja go davil boahtá, de lea Čuonjáluodda hui oidnosis.
– Mii diehtit ahte leat hui unnán viessosajit mat heivejit ealáhusdoaimmaide márkanguovddážis. Mii diehtit ahte badjin lea dál šaddame ođđa guovddáš, ja doppe leat dušše moadde viessosaji, lohká son.
Ođđa márkanguovddáš
Bongo lohká ahte márkana davágeahči lea dál šaddagoahtán ođđa márkanguovddážin, earret eará ođđa Extra rámbuvrra dihte. Ovdagoddi ságastalai áigot go juohkit viessosajiid gos lea várra ahte soames oažžu ealáhussii viessosaji, muhto ii leat movt ge sihkkarastojuvvon ahte bisuhuvvo ealáhusdoaibma doppe.
Suohkan lea juohkán olu viessosajiid seamma guovllus, seamma ulbmilii. Ovdagoddi ii diehtán riekta movt ovdal lea meannuduvvon, eai ge diehtán sáhttet go hilgut ohcama danne go ii leat dáhkádus ahte bisuhuvvo ealáhus sajis, vai rievdá go ássanviessun. Ovdagoddi áigu dárkileappot guorahallat movt ovdal leat meannudan áššiid seamma guovllus, ja maid njuolggadusat celket. Ášši maŋiduvvui ovttajienalaččat dassá go ožžot eambbo dieđuid dan birra.
