-Almmuhus-
VALÁŠTALLANDá čievččasta vuoitomoala

Dá čievččasta vuoitomoala

-

-

Dán jagaš dievdofinála Nilut Cupas lei mearehis gelddolaš. Boađus lei 3-3 go goappaš vuorut ledje nohkan, dasto šattai nu ahte goabbá joavku ovdal báhčá moala, vuoitá. Nagirvári lunttat ledje dán jagi buoremusat.

Dán jagaš Nilut Cupa čiekčamat loahpahuvve odne. Dievdduid finála šattai mearehis gelddolaš go Team Nilut ja Nagirvári lunttat goappašagat ledje báhčán golbma moala go áigi nogai.

Dasto šattai nu ahte čiekčamat jotke, dassážii go nubbi joavku nagodii moala báhčit. Nagirvári lunttat ožžo ráŋggáštusčievččasteami, ja dan Dag Andreas Balto čievččastii njuolga mollii. Olles joavku viegai de šillju ala ja álge illudit Nilut Cup vuoittu.

 

(Ášši joatká gova vuolábealde)


Vuoitomoalla

 

Romssa joavku siektan Nilut cupii

Nissoniid finálas deaivvadedje PSG ja Nagirvári nieiddat. Nagirvári nieiddat nagodedje álggos vuosttaš moala oažžut, muhto dan maŋŋil báhče PSG golbma moala, ja vuite dán jagáš Nilut cupa.

Goappaš vuoitolágain ledje dán jagáš buoremus čiekčit. Dag Andreas Balto Nagirvári lunttain ja Elin Løvstad PSG joavkkus.

– Lean leamaš dáppe daid 6-7 maŋemuš jagi, ja lean máŋgii báhčán buot eanemus moalaid dáin čiekčamiin, muhto dál lea vuosttaš háve beassan buoremus čiekčin, dat lei oba somá! lohká Elin Løvstad.

 

(Ášši joatká gova vuolábealde)


Dag Andreas Balto ja Elin Løvstad šattaiga daid čiekčamiid buoremus čiekčin.

 

Romssa joavku PSG lea searvan Nilut Cup čiekčamiidda máŋgii, ja leat oktii vuoitán. Jus okte vel vuitet, de ožžot vuoitopokála ruoktot. Løvstad muitala ahte sii áigot boahtte jagi maid searvat.

– Nilut cup lea hui somá, ja dáppe lea erenoamáš vuoigŋa. Lágideaddjit leat hui čeahpit. Dasa lassin leat mii veaháš sápmelaččat vel, reašká buoremus nissončiekči.

Son muitala ahte sii čikčet ráidočiekčamiid Romssas, ja leat nagodan ordnet nu ahte eai leat ráidočiekčamat juste de go Nilut Cupa lea, vai besset searvat. Dán jagi ledje searvan guvttiin joavkkuin, PSG ja PSG Black. Dál besset máhccat Romsii golliin ja bronssain, go PSG Black vuittii bronsafinála Buldoser joavkku vuosta.

 

Faskii silbba ja golli

Okta guhte maid lea fasken sihke golli ja silbba lea Nagirjoavkkuid jođiheaddji Aslak Anders Gaino. Goappaš su joavkkut Nagirvári nieiddat ja Nagirvári lunttat ledje finálas.

– Lean 2005 rájes searvan Nilut cupii, ja lea nu buorre dovdu viimmat vuoitit, go lean geahččalan nu máŋgii. Nilut cupas lea somá ja hui buorre dássi, buorit čiekčit geat dollet buori dási. Go de birge bures, de lea vel suohttasit, lohká son.

(Ášši joatká gova vuolábealde)


Aslak Anders Gaino

 

Gaino muitala ahte sus leat moadde čiekči geat álggu rájes juo leat bisson su joavkkus, Frank Ole Vars ja Jon Andreas Eira. Son muitala ahte áiggi mielde lea čoaggán eanet ja eanet čikčiid, ja dál lea oalle buorre joavku šaddan.

Movt don nagodat guokte joavkku oažžut finálii?

– Dat lea veahá das maid sihkkarit go mii leat veahá beaggán. Mii lávet leahkit buorit dákkár čiekčamiin, ja buorit čiekčit háliidit čiekčat min mielde. Dieđusge nieiddat eai nagodan vuoitit, muhto dat lei lahka, leimmet álggos vuoittu bealde. Nuppi jagi mii boahtit fas ja geahččalit vuoitit, lohká Gaino.

Son illuda dál Kárášjohkii “Førjuls” čiekčamiidda, gos sii leat máŋgii ovdal vuoitán, ja áigot dán jagi maid vuoitit.

 

Buorre dássi

Nilut cup jođiheaddji Isak Ole Hætta lohka buori dási Nilut cup čiekčamiin.

– Dat mat leat ollen guhkimussii, erenoamážit semifinála joavkkut, dain lea alla dássi, ja dat leat čiekčit mat beaivválaččat čikčet nuppi ja vuosttaš divišuvnnas. Dievdduid finála lei hui gelddolaš, das ledje čiekčit mat beaivválaččat čikčet alla dásis.

 

(Ášši joatká gova vuolábealde)


Cup-jođiheaddji Isak Ole Hætta

 

Hætta lea hui ilus go nu olu alla dási čiekčit servet Nilut cup čiekčamiidda.

– Dat lea min movttiidan joatkit, go leat čiekčit mat illudit boahtit deike, ja vuoruhit Nilut cupa. Gulán dál juo, nugo PSG geat vuite, sii vuoruhit Guovdageainnu ovdal go eará čiekčamiid.

Son lea maid duhtavaš vahkkoloahpain, ja lohka buot mannán njuovžilit, ja nu go galggai

– Vahkkoloahppa lea mannán hui bures. Čiekčamat mannan áibbas bures, ja ii mihkke leat dagahan ahte mii eat leat duhtavaččat. Hui unnán roasmmehuvvan, lea mannán hui njuovžilit ja bures.

 

Ovdal go finálat álge, juoiggastii Juoigalasat searvi moadde luođi. Geahča video vuolemusas áššis!


Nora Vang PSG joavkkus ja Vegard Båtnes Braaten Team Nilut joavkkus bážiiga eanemus moalaid dain čiekčamiin, 12 goabbáge. Svein Ove Thomassen Johansens utvalgte joavkkus bážii maid 12 moala, muhto ii šaddan mielde govvii.


PSG


Nagirvári lunttat

-Almmuhus-