Dássážii ii leat NVE ožžon dieđu ahte koronavirus uhkida nationála elfápmobuvttadeami. Muhto dilli sáhttá rievdat nugo heajos dálkkiin.
NVE dahje Norgga čázádat- ja energiijadirektoráhta dieđiha iežaset ođassiiddus ahte koronavirus ii uhkit nationála elfápmobuvttadeami. Muhto dilli sáhttá rievdat ja dan dihtii leat sii ásahan nve.no siiddus sierra báikki gos gávdná eambbo dieđuid dán ášši birra.
Sii leat maid evttohan ahte elfápmobursa Nord Pool heivehuvvo gearggusvuođabargguide.
– Lea buorre oaidnit ahte elfápmobuvttadeami vuogádat maid mii leat ráhkadan, doaibmá dákkár váttis dilálašvuođain. Mii vásihat ahte fitnodagat barget ámmátlaččat ja ahte sii áddejit man dehálaš lea leat mielde dán eaktodáhtolaš barggus. Ovttasbargoguoimmit ovttasbarget bures, lohká Čázádat- ja energiijadirektevra Kjetil Lund.
Son lohká dilli sáhttá rievdat jus šaddá hástaleaddji dálki ja stuorra dárbu divvut elfápmorusttegiid ja linjjáid. Muhtin fitnodagat leat čujuhan muhtin hástalusaide maid berre čoavdit ja NVE lea ovttasráđiid fitnodagaiguin bargamin áššiin.
Čázádat- ja energiijadirektevra Kjetil Lund muitala sis leat hástalusat mat gusket bargovehkii, njoammudávddatestemii, mánnágehččui ja errenáigginjuolggadusaide. Lohká olu fitnodagat leat dieđihan lea váttis fáhtet doarvái bargiid dan dihtii ja maiddái mátkegieldimiid dihtii.
Lund čilge norgalaš elrávdnjevuogádagas lea márkan dehálaš. Ahte Nord Pool šaddá oassin Norgga gearggusvuođas, mearkkaša ahte dat oažžu sihke ovdamuniid ja geatnegasvuođaid mii dagaha ahte elfápmobuvttadeami gearggusvuohta buorrána.
Gearggusvuođadilálašvuođain ožžot maid dieđu NVE:s ja Oljo- ja energiijadepartemeanttas ja sis šaddá geatnegasvuohta dieđihit elfápmobuvttadandili NVE:i.
