Váhnemat bivdet suohkanpolitihkkariid muitit mánáid ja nuoraid dál go válgabeaivi lahkona.
Ohppiid fysalaš skuvlabiras áŋgirušša váhnemiid, go dat váikkuha mánáid dearvvašvuođa, loaktima ja oahppama, čalliba Henrik Gaup ja Rune Benonisen cealkámušas Vuođđooahpahusa Váhnenlávdegotti(VVL) ovddas.
Dan dihte sávvet sii ahte politihkkarat bidjet eambbo fuomášumi dasá ovdal válggaid.
Skuvlabiras dehálaš
Skuvlavisti ja movt dat lea hábmejuvvon lea dehálaš mánáid skuvlabirrasii, oaivvildit váhnemat Váhnenlávdegottis.
– Mii háliidit ahte min mánát loktet, ovdánit ja ahte sis lea buorre dilli skuvllas, sihke siste ja olgun. De lea dehálaš ahte fysalaš ja psyhkalaš skuvlabiras lea buorre, čálliba Gaup ja Benonisen.
Soai čujuheaba Oahpahuslága párágráfa 9A7, gos čielgasit boahtá ovdan ahte skuvlavisttit galget plánejuvvot, huksejuvvot, láhččojuvvot ja doaimmahuvvot dainnalágiin ahte várre ohppiid oadjebasvuođa, dearvvašvuođa, loaktima ja oahppama.
Dat galgá álo čuovvut fágalaš norbmaid maid fágaeiseváldit ávžžuhit.
Jus eai čuovo, de galgá skuvla liikká duođaštit ahte sii gokčet gáibádusaid.
Hástalit politihkkariid
Váhnenlávdegoddi vuorjašuvvá go máŋgga sajiin leat skuvllat boarásnuvvame, ja dan sivas hástalit suohkanpolitihkkariid vuoruhit skuvllaid ja bidjat ruđa dasa.
– Dál lea suohkanpolitihkkariin buorre vejolašvuohta čájehit ahte sii duođai áigot bidjat doaimmaid johtui ja maiddái eastadit ahte mánát gevvet olggobeallái, loahpaheaba Henrik Gaup ja Rune Benonisen váhnenlávdegottis.
