Árjeluoveduoddaris leat mannan giđa báhčán olu ruksesriebaniid, ja dat lea leamaš veahkkin čuotnjágiidda.
Árjeluoveduoddaris leat mannan giđa báhčán olu ruksesriebaniid, ja dat lea leamaš veahkkin čuotnjágiidda.
Ruoŧa áidna bessenbáiki áitojuvvon fjällgås, dahje sámegillii čuonjá, galgá suddjejuvvot, čállá sverigesradio.se.
– Mii oaidnit olu buriid mearkkaid, muhto eai leat nu stuorra logut, guhtta čivgga dán jagi. Leat beali eambbo čuonjáčivgga go lávejit, lohká čuonjáprošeaktajođiheaddji Niklas Liljebäck.
Rieban stuorámus vašálaš
Son muitala ahte rávis čuotnjágat eai leat girdilan eret guovllus.
– Dehálaš dás leamaš ahte leanastivrras leat bivdán ruksesriebaniid dán giđa. Ruksesrieban lea stuorámus vašálaš čuotnjágiidda go dat goddá sihke rávis čuotnjágiid ja daid čivggaid ja váldá maid daid maniid. Leamaš ávki dán guovllu ruksesriebaniid báhčit. Muhto moadde čivgga jahkásaččat ii leat doarvái gádjut čuotnjágiid nu ahte prošeakta luittii dán jagi 85 čuotnjága lundui.
Áitojuvvon jávkat
Moadde jagi dás ovdalis gávdnojedje gaskal 15 ja 25 čuotnjága mat bessejedje Ruoŧas. Danin lohká Artdatabanken ahte fjällgås dahje čuotnjágat leat áitojuvvon jávkat. Jus čuotnjágat galget ceavzit boahtte áigái, de fertejit leat eambbo čuotnjágat mat bessejit.
– Jus gávdnošedje birrasii 100 pára mat bessejit, de livččii mis buoret dovdu, lohká Niklas Liljebäck.
