-Almmuhus-
KULTUVRAČuojahit sámedánssain

Čuojahit sámedánssain

-

-

Felgen Orkester čuojaha vuosttaš geardde ruoŧabealde, ja dat dáhpáhuvvá ovtta sámi stuorámus meassuin, nammalassii Johkamohki márkaniin.

– Mii leat guhká háliidan čuojahit sámedánssas Johkamohkimárkaniin, muhto dat ii leat goassege lihkostuvvan. Dán jagi de heivii ja mii leat ožžon ovddasvástádusa guoimmuhit lávvardateahkeda Johkamohki márkaniin, muitala Felgen Orkestera vokalista Petter Tretnes Hansen.

 

Ii leat leamaš doppe ovdal

Johkamohki márkanat leat dán jagi guovvamánu 4. beaivvis gitta 6. beaivái. Márkaniid oktavuođas lávejit lágidit sámedánssaid Folkets Hus visttis, ja dohko dat čoahkkanit ge sámenuorat. Felgen Orkesteris lea ovddasvástádus lávvardateahkeda konseartta ovddas, ja sii dohppejit vel Magne Biti mielde, guhte galgá doaibmat dj:in ja čuojahit gaskkohagaid.

– Šaddá gelddolaš oaidnit mo doppe lea. In leat goassege ovdal leamaš Johkamohkemárkaniin, lean dušše gullan daid birra ja de šaddá somá vásihit daid. Lea maid miellagiddevaš oaidnit dovdet go dien guovllo olbmot min musihka, lohká Tretnes Hansen.

 

Tretnes Hansen muitala iežaset eanaš čuojahit Davvi-Sámis.

– Nu sáhttet ge dien konsearttas leat olu guldaleaddjit geat eai leat goassege leamaš min konsearttain, lohká son.

 

Dánsut gal besset

Sii geat leat galledan Johkamohkimárkaniid, gal dihtet ahte sámedánssas lávejit olusat dánsut, erenoamážit dánsot nu gohčoduvvon «sydis-dánssa» mii veahá muittuha swinga, foxtrot ja bugg dánsunmálliid. Ja vaikke vokalista ii loga ge oaidnán dán dánsunmálle eará go dalle go Jon Henrik Fjällgren lávllui ruoŧa Melodifestivalenis, de jáhkká iežaset musihka heivet dása.

– Jua, dan mun gal jáhkán. Mis han leat muhtin lávlagat main lea dakkár swing-šuokŋa. Ja lean maid oaidnán ahte guldaleaddjit lávejit dánsestit swinga min konsearttain, lohká Felgen Orkestera vokalista.

 

Johkamohkimárkaniin leat maid diehttelasat márkanat, gos fitne oastit feara maid. Muhto Petter Tretnes Hansen ii jáhke gal iežaset astat gávppašit nu beare sákka.

– Mis lea mielde jietnabuvttadanbargit geaid leat bálkáhan, ja rusttegat maid galgat oažžut sadjái ovdal konseartta. Mis gal leat nu olu doaimmat go galgat ráhkkanit eahkedii ahte eahpidan min astat daid márkaniid gal galledit, čaibmá son.

 

Felgen Orkester čuojaha Sámeálbmotbeaivvi, guovvamánu 6. beaivvi Folkets Hus visttis Johkamohkis. Konsearta álgá diibmu 2200.

-Almmuhus-