Njealjis juohke logát olbmos eai dieđe ahte priváhta el-čiekčansihkkeliin dál gáibiduvvo ovddasvástádusdáhkádus, čájeha ođđa iskkadeapmi maid Tryg Forsikring lea čađahan.
Ođđajagi rájes lea buohkain geat eaiggáduššet ja geavahit el-čiekčansihkkela láhkageatnegasvuohta dáhkidit daid. Norggas gávdnojit máŋga čuođiduhát el-čiekčansihkkela, muhto dán rádjái lea Tryg vuovdán dušše moadde duhát el-dáhkádusa.
– Dál lea giđđa ja mii ballat ahte ollugat geat eai leat dáhkidan el-čiekčansihkkeliid váldet daid atnui, ja sii sáhttet risikeret vaikko miljovnna vealggi jus vahágahttet olbmuid, dahje jus buollá go lea láddemiin. Dál ferte hoahpuhit dáhkádusain, go dat lea máŋga čuođiduhát el-čiekčansihkkelis sáhka, dadjá Tryg gulahallanráđđeaddi Torbjørn Brandeggen.
