Statnett áitá váidit Lákkonjárgga orohatjođiheaddji Hans Ole Eira go sivahallo rokčen Statnett biilla.
Statnett áitá váidit Lákkonjárgga orohatjođiheaddji Hans Ole Eira go sivahallo rokčen Statnett biilla.
Altaposten čállá odne Statnett ja Lákkonjárgga orohatjođiheaddji Hans Ole Eira birra. Ášši lea ahte Statnett áitá politiijaide váidit orohaga ja čuoččuha Eira vuodján ovtta entreprenevrra biilla njeaiga dan luottas maid Statnett dál lea hukseme rusttegiid fievrredan váste Eaibu guovllus Álttás. Statnett prošeaktajođiheaddji Jakob Grønn lea sádden reivve Hans Ole Eirai.
– Fuolakeahtes vuodjin
– Njeallje ATV sihkkela vudje alla leahtuin borgemánu 23.beaivvi namuhuvvon guovllus. Nubbi ATV guoskai entreprenevrra biilii. Dat lea fuolakeahtes vuodjin, ja dáhpáhus lei ilgat ja várálaš dearvvašvuhtii, birrasii ja sihkkarvuhtii, čállá prošeaktajođiheaddji, gii vel lasiha ahte dat nubbi ATV govvejuvvui, mas oaidná ahte ATV gullá Eirai.
Biehttala čuoččuhusaid
Hans Ole Eira lea vástidan Statnettii, ja Altaposten namuha oasi reivves maid Eira lea addán Altapostenii.
– Mun áiggun biehttalit Statnetta čuoččuhusaide, go dát lea njuolgut gielis, čállá son ja duođašta ahte son lei dan guovllus borgemánu 23.beaivvi go lei divodeame áiddiid váris. Go lei jođus vulos váris, de lei okta biila gasku luotta, ja son fertii vuordit gitta vuoddji fas ollii biilii. Eira lohká ahte son ii guoskan biilii go vujii dan meattá.
– Lea go dábálaš Statnett bealis govvet olbmuid geat leat meahcis rabas luottain, ja giellásiiguin sivahallat ja áitit váidit ja gáibidit buhtadusa, jearrá Eira.
