-Almmuhus-
OĐĐASATČuoččuhii lea heakkaheađis go bissehalai

Čuoččuhii lea heakkaheađis go bissehalai

-

-

Diggegoddi ii jáhkkán dievddu (55) čilgehussii ahte son lei heađis vuoddján doaktára lusa go ii nagodan šat vuoigŋat.

Politiijat bissehedje 55-jahkásaš dievddu riikkageainnu 93:as Álttá lahka, muhtin iđida diibmu beal guđas borgemánus 2013.

 

Gullái ihkku

Son čilgii ahte lei juhkan eahkeda ovdal iežas olbmáin, gii lei guođđán biilla su lusa go manai ruoktot. 55-jahkásaš lea de ihkku gullán, go ii báljo nagot vuoigŋat. Sus lea oainnat duođalaš geahpesdávda kols.

Go ii gávdnan iežas telefunna, ii ge beassan riŋget doaktárii oažžut vuoigŋanveahki, lohká son iežas nu heađásnuvvan ahte dohppii olbmá biilla ja vuoddjái ieš Áltái.

 

Ii gillen vuorjat

Ii son lohkan ihkku gillen vuorjat olbmuid, ii ge diehtán leatgo dan báikkis olbmot.

 

Riikkageainnu nalde, bohtet politiijat su maŋil, ja sii bissehit su. Politiijabálvá šiittii dikkis ahte dievddus orui panihkka, ii ge dievdu lean vástidan politiijaide go jerre dárbbaša go ambulánssa. Politiijat dolvo de ieža su doaktára lusa, go eai árvvoštallan ahte lei nu hoahppu.

 

Nissona lusa doalvut

Doavtterkantuvrras válde de varraiskosa, mii čájehii ahte lei buorre oksygenamearri varas. Go gearggai doavtterkantuvrras, muitalii politiijabálvá ahte sii dolvo dán dievddu muhtin nissona luhtte finadit Álttás, nugo lei bivdán.

 

Čájehuvvui ahte su varas lei 1,56 promilla diibmobeali maŋŋel go bissehuvvui. Diggegoddi gávnnahii ahte dán áššis ii leat sáhka heahtedagus, ja son lei sáhttit baicca dieđihit ránnjáide ahte lea heađis, nugo deaddit biillas njurggona vai ránnját gullájit.

 

Njealját duopmu

Dievdu, gii lei golmma háve dán ovdal juo dubmehallan vuodjimis gárrenoaivvis, lei gáibidan ahte beassá oalát dán áššáskuhttimis. Muhto áktor oaččui dan ráŋggáštusa go lei gáibidan áššis. 55-jahkásaš dievdu dubmehalai giddagassii 36 beaivái, ja sáhkkohallá 15 000 ruvnnuin dahje vel 15 beivviin, ja vel vihtta jagi leat vuodjingoartta haga. Áššegoluid gal ii dárbbaš máksit.

 

-Almmuhus-