Guovddášbellodaga stuoradiggeáirras Heidi Greni cuiggoda ráđđehusa go eai doala lohpádusa lávvordataviissaid ektui.
Guovddášbellodaga stuoradiggeáirras Heidi Greni cuiggoda ráđđehusa go eai doala lohpádusa lávvordataviissaid ektui.
– Ráđđehus ii leat doallan lohpádusa ahte buohkat galget oažžut lávvordataviissaid vaikko Poasta lea heaittihan poastadoalvuma lávvordagaid. Stuoradiggi lea dadjan čielgasit ahte fertejit gávdnot čovdosat aviisadoalvumii, ja stáhtaráđđi Solvik-Olsen lohpidii ahte aviisadoalvuma čoavddus lea jo sajis. Lohpádusa eai leat doallan. Danne lean gohččon Stuoradikki vástidit movt sii áigot sihkkarastit ahte olbmot ožžot aviissa lávvordagaid, dadjá Guovddášbellodaga stuoradiggeáirras Heidi Greni preassadieđáhusas.
Eai oaččo aviissa man ovddas leat máksán
Ođđa poastaláhka mearriduvvui geassemánu 2015:s. Ráđđehus oaččui doarjaga Stuoradikkis heaittihit poastajuohkima lávvordagaid, dan vuođul ahte galge gávdnat čovdosiid mat sihkkarastet ahte lávvordataviissat ollejit lohkkiide.
Poasta juohká 15 proseantta aviissain mat galget boaittobeale guovlluide. Kvikkas fitnodat ásahuvvui mii galggai bargat aviisajuohkimiin maŋŋel go Poasta ii šat gokčan dan barggu. Ođđa fitnodat ii leat nagodan čađahit barggu.
– Stuoradikki mearrádus ii leat olihuvvon. Dat lea heittot, ja vearrámus lea sidjiide geat masset lávvordataviissa man ovddas leat máksán. Mánnodaga oažžut lávvordataviissa ii leat dohkálaš alternatiiva olbmuide, muitala Heidi Greni, gii vuordá ahte stáhtaráđđi geavaha iežas vuoigatvuođa sihkkarastit ahte Stuoradikki mearrádus čuvvo ja ahte olbmot ožžot lávvordataviissa mii lea lohpiduvvon ja man ovddas sii leat máksán.
