Internašunála Sámi Filbmainstituhtta lea almmuhan ođđa doarjjaortnega sámi filbmadahkkiide ja buvttadeddjiide.
Covid-19 dilli lea čuohcan garrasit filbmaealáhussii miehtá máilmmi. Sámi filbmasuorgi lea leamaš várrogas ja čuvvon njoammuneastadanrávvagiid. Dát dilli lea maŋidan ollu buvttademiid (65%) ja buvttadanfitnodagat leat massán dietnasiid (80%), dieđiha Internašunála Sámi Filbmainstituhtta sin preassadieđáhusas.
Čuohcan garrasit
Lassin dálá filbmadoarjagiidda, ISFI almmuha dál Sámi filbma covid-19 veahkkedoarjagiid sámi filbmadahkkiide ja buvttadeddjiide. Doarjjaortnet bistá skábmamánus 2020 geassemánnui 2021.
– ISFI bealis leat oaidnán ahte covid-19 dilli lea čuohcan garrasit maiddái sámi filbmaealáhussii, nu go muđui máilmmis, ja ollu buvttadeamit leat maŋiduvvon ja leat maid massán dietnasiid. Mii vásihit maid ahte sámi filbmadahkkit leat várrogasat álggahit ođđa stuorit buvttademiid go lea nu eahpesihkkaris dilli. Mii sávvat ahte ISFI sámi filbma covid-19 veahkkedoarjagat sáhttet addit dorvvolašvuođa maid dál dárbbašit vai sáhttet joaŧkit dainna buriin bargguin maid sámi filbmadahkkit dahket, dadjá ISFI direktevra Anne Lajla Utsi.
Doarjja lea heivehuvvon covid-19 dillái, eai ge leat ohcanáigemearit.
Doarjagat maid filbmadahkkit sáhttet ohcat:
Buvttadeapmi 2: Lassi buvttadandoarjja heivehit buvttadeami covid-19 dillái. Sáhtát váldit mielde vuorddekeahtes goluid buvttadeami oktavuođas dahje buvttadeami maŋideami dahje bisseheami lassigoluid.
Ovdánahttin 2: Lassi ovdánahttindoarjja ovtta dahje eanet prošeavttaide heivehit covid-19 dillái.
Distribišuvdna 2: Lassi distribušuvdnadoarjja ovtta dahje eanet filmmaide hievehit covid-19 dillái.
Digitaliseren: Heivehit doaimmaid digitála lávddiide dálá dili hárrái.
Doarjja gelbbolašvuođaloktendoaimmaide, nu go bargobájiide, kurssaide ja mentoriidda.
