Porsáŋggu gielda dieđiha ahte korona dihtii leat sis dál uhcán bargit buhcciidossodagas gos leat fuomášan guhtta ođđa korona, njealji bargis ja guovtti buohccis. Dan dihte leat 22 bargi ja 18 pasieantta erremis.
Gaskavahku dieđihii Porsáŋggu gielda ahte gieldda buhcciidossodagas lea dál vearrás dilli, go ovdal lea juo korona njommon ovtta dearvvašvuođabargái ja ovtta pasientii. Njoammun boahtá Hámmárfeastta buohcceviesus.
Maŋŋebargga veaigin gávdne vel guhtta ođđa njoammuma seamma ossodagas, njealji bargis ja guovtti pasieanttas.
– Mii leat odne garrasit bargan doalahit dábálaš doaimma, lohká Porsáŋggu gieldda sadjásaš sátnejođiheaddji, Sylvi Johnsen.
Son giitá buohkaid, sihke bargiid ja jođiheddjiid, geat leat áŋgirit bargan.
Vearrámus dilli Porsáŋggus
Porsáŋggu gieldda njoammuneastadandoavttir ja gielddabajitdoavttir Jørn Gregersen govvida dili vearrán Porsáŋggus gos leat čieža koronabuohcci lassin sidjiide geat leat njoammuduvvon buhcciidossodagas.
– Mii leat álggahan buot dárbbašlaš doaimmaid vai mii leat njunnošis. Nu mo dál lea, de lea mis nu gohčoduvvon «worst case scenario» dahje vearrámus dilli. Mii leat ferten muhtin bargiid bidjat erremii. Dan geažil leat mii ožžon hástalusa oažžut doarvái bargiid gáibideaddji árgabeaivvi barggus. Bargoveaga dáfus leat mis dál vuos doarvái bargit, nu ahte gieldda ássit, geat dárbbašit dearvvašvuođaveahki, ožžot dan. Doavtterfákta lea birrajándora doaimmas ja olbmot sáhttet čuojahit telefuvdnanummirii, lohká gielddadoavttir Jørn Gregersen.
Njoammudávdda guorran
Gaskavahkku álggahuvvui bargu guorrat gos njoammudávda lea vuolgán, erret dan ja bidjat erremii buohkaid geat galget erremii.
– Sávvat ahte eat oaččo eambbo duođaštuvvon covid-19 buhcciid, eat gosge, lohká Porsáŋggu gielddabajitdoavttir Jørn Gregersen.
Lea čájehuvvon ahte korona lea oalle váttis fuomášit, go vuosttaš iskkus sáhttá leat negatiiva, ja go nuppes isket, de lea positiiva. Juste dat lea ge dáhpáhuvvan buhcciidossodagas.
– Njoammudávdda guorran ja čuovvuleapmi lea váttis. Muhto mii fertet dušše iskat ja iskat bargiid ja pasieanttaid. Dat buohcci lei juo erremis ovdalgo iskojuvvui ja biddjui njuolga sierra erremii maid mii leat ásahan, amas ii dávda njoamu buhcciide geat leat boares olbmot. Sáhtán lohkat ahte buohkain, geat leat duođaštuvvon positiivan, lea dilálašvuođa dáfus buorre dilli. Mii leat fuolahan buoremus vuogi mielde, deattuha gielddabajitdoavttir Jørn Gregersen.
Uhcán bargit
Porsáŋggu gielddadirektevra Bente Larsen muitala son oaččui dieđu ahte dássážii lea gávccát olbmui njommon covid-19 Porsáŋggu buhcciidossodagas.
– Gáibideaddji dili leat vuđolaččat áimmahuššan sihke buhcciidossodagas ja gielddas. Buhcciidossodat lea áimmahuššan buhcciid, dieđihan oapmahaččaide ja bargiide. Bargit ja jođiheaddjit leat gávdnan buriid čovdosiid go leat uhcán bargit, lohká gielddadirektevra Bente Larsen.
Son muitala sii leat dieđihan fylkkamánnái mo dilli lea gielddas. Dan sivas oažžu gielda veahki fylkkadoaktáris, UNN buohcciviesu njoammudávdaáššedovdis, gii galgá sin veahkehit eastadit njoammuma buhcciidossodaga ossodagain.
