-Almmuhus-
-Almmuhus-
OĐĐASATČovde iežaset eret ROBEK listtus     

Čovde iežaset eret ROBEK listtus     

-

-

Kárášjoga gielddastivra dohkkehii gieldda 2021 rehketdoalu geassemánu 20. beaivvi ja nu beassá eret ROBEK hálddus gos leamaš 2019 rájes.

Kárášjoga gielddastivra meannudii jagi 2021 jahkedieđáhusa ja rehketdoalu ja dohkkehii ovttajienalaččat dan.

– Dál leat čovdojuvvon eret ROBEK-listtus. Mii leat máksán daid dološ velggiid ja dál sáddet dan fylkkamánnái. Dál go dohkkeheimmet jagi 2021 rehketdoalu, de beassat maid automáhtalaččat eret ROBEK listtus. Dál leat ieža eaiggádat iežamet ruhtadili badjel, lohká Kárášjoga sátnejođiheaddji Svein Atle Somby. 

Lohká ii dieđe šaddá go geahppasabbot gildii, muhto gielda oažžu stuorát vejolašvuođaid. 

– Mii leat hállan investeret skuvllaid, dearvvašvuođaguovddáža ja eará stuorra investeremiid man birra mii leat smiehttan. Okta eaktu dasa, lea ahte mii beassat eret ROBEK listtus dál go mis lea dearvvašlaš ruhtadilli. Mis lea ain hástalusat boahtte jagi mielde. Mii fertet ain geahpedit ruhtageavaheami go mii measta geavahat menddo olu ruđaid ain ovdalgo sáhttit huksegoahtit, dadjá sátnejođiheaddji. 

Fertet veaháš velá seastit

Danin lea dárbu ahte gielda ain bidjá návccaid geahpedit ruhtageavaheami. Somby muitala Kárášjoga gielda leamaš ROBEK listtus badjelaš golbma jagi, 2019 rájes. 

– Lean lohkan ahte mii eat galgga jurddašit ahte leat beassan eret ROBEK listtus, muhto jurddašit ahte mii fertet oahppat ruđaid geavahit jierpmálaččat ja seastit gokko galgat ja deavdit seastinkontoi ja fondii, dadjá Somby.

Lohká su mielas lea ROBEK listu máŋgga dáfus hui buorre dakkár gielddaide mat leat heajos dilis, go stáhtahálddahusa bagadallan lea buorre gildii.

– ROBEK čuovvu mielde ja gáržžida min láhttenvejolašvuođa, muhto bagadallet mo mii galgat ruđaid geavahit, lohká Kárášjoga sátnejođiheaddji Somby. 

Son muitala ahte ROBEK stáhtahálddašeaddji bagadallan ja «boahttevaš Kárášjoga» prošeakta leamaš hirbmat ávkkálaš Kárášjoga gildii. Lohká dán boahttevaš Kárášjoga prošeavttain galggašii sihkkarastit ahte gieldda ruhtadilli bissu ortnegis boahttevaš jagiid. 

ČUOVVU: Kárášjoga sátnejođiheaddji Svein Atle Somby muitala ahte ROBEK čuovvu mielde ja gáržžida sin láhttenvejolašvuođa. Vuorkágovva: Astrid Helander
ČUOVVU: Kárášjoga sátnejođiheaddji Svein Atle Somby muitala ahte ROBEK čuovvu mielde ja gáržžida sin láhttenvejolašvuođa. Vuorkágovva: Astrid Helander

Olmmošlohku njiedjan

Gielddastivrras bođii ovdan ahte maŋimuš jagiid lea 431 olbmo gaskal 20-65 jagi fárren gielddas. 

– Lea oalle divrras gildii, erenoamážit go nu olu bearašolbmot fárrejit, go gielda massá dan dihtii olu ruđa. Mii oaidnit dat ii geava dušše Kárášjogas. Mii eat galgga dan dohkkehit, mii galgat geahččalit iežamet politihka heivehit nu ahte bearašolbmot ja mánnáolbmot oččošedje bargguid ja loavttašedje dáppe. Mii galgat doalahit dan álo čalmmis, maiddái olles álbmoga ja doalahit olles álbmoga mat leat dáppe, deattuha Kárášjoga sátnejođiheaddji Svein Atle Somby. 

Son mieđiha ahte gielda ii nagot gilvalit stuorát báikkiin. 

– Mii galgat vuoruhit bisuhit olbmuid gielddas, lohká Svein Atle Somby. 

Mearkkašahtti bušeahtta spiehkasteapmi

Oarje-Finnmárkku suohkanrevišuvdna (SGO) lea dárkkistan Kárášjoga gieldda 2021 jahkerehketdoalu. SGO čállá ahte sii leat revideren gieldda jahkerehketdoalu mii čájeha ahte netto doaibmaboađus lea kruvnna 9.389.777 ja lassigeavaheapmi lea kruvnna 0. Jahkerehketdoalus lea balánsa, doaibma ja investeren juolludanbajilgovat, ekonomalaš doaibmagovva ja oppalašgovva man olu oktiibuot lea spiehkastan bušeahtas ja jahkerehket loahpaheame disposišuvnnaid ja nohtat jahkerehketdollui, dás maid čoahkkáigeassu dehálaš rehketdoalu prinsihpaid.

SGO vuolláičálli, revisor Kai Roger Olsen čállá sii leat dárkkistan dan mearkkašahtti bušeahta spiehkasteami. Daguid ja duođaštemiid vuođul eai leat gávdnan makkárge dieđuid mat njeaiddašedje jahkedieđáhusa dieđuid mearkkašahtti bušeahta spiehkasteami luohttehahttivuođa. 

– Diet mearkkašahtti bušeahtta spiehkasteapmi lea teknihkalaš sátni maid revišuvdna geavaha. Dat eai leat makkárge boasttuvuođaid birra. Lea dan dihtii go ii boahtán ovdan rehketdoalus bušeahta ektui. Lea dušše cuiggodan ahte ii berre leat nu, lohká gieldda dárkkistanlávdegotti jođiheaddji Roald Andreas Inga.

-Almmuhus-