Guovdageainnu valáštallansearvi bovde buohkaid geat nagodit guokkardit ja vázzit sosiálaeahkedii odne, Bákteváris.
Ihttin, geassemánu 2. beaivvi ávvuda Guovdageainnu valáštallansearvi 80-jagi.
Dan oktavuođas áigot čorget ja ordnestallat olggobealde valáštallanhálla.
Doarvái bargu buohkaide
Juste dál ii leat visot ortnegis ja čorgat olggobealde Báktehárjji, ja dainna áigot dál ovttasráđiid bargat juoga.
Valáštallansearvi lea jurddašan doppe málet, levget, ruskkaid čoaggit, geđggiid čorget, lonuhit neahta moalain, sirdit boares moalaid boares spábbačiekčanšilljui ja eará smávva diŋggažiid.
– Mii oaidnit dárbbu dása go eat hálit čájehit iežamet stádiona, nu go dál lea, gussiide eat ge earáide. Danne oaidnit dárbbu čorget ja ordnet doppe ovdal ávvudoaluid, dadjá Frank Robert Turi.
Dárbbašit juohkelágan olbmuid
Son sávvá ja hástala buohkaid geat gostet vázzit boahtit veahkkin, go sis lea bargu buohkaide.
– Listtu lea guhki, nu ahte hástalit boahtit nu olusiid go vejolaš. Mađi eambbosat, mađi jođáneappot manná bargu, dadjá son.
Sosiálabealli maiddái
Guossohit maiddái váffelgáhkuid, gáfe ja bruvssa, nu ahte ii šatta dušše bargu.
– Mii galgat snihkket, dasa dárbbašit dakkáriid geat dan máhttet, ja áigut maid steiket váffelgáhkuid ja dasa dárbbašat dakkáriid geat dan máhttet. Ii leat dušše bargu, muhto herskostallan maiddái, dadjá son loahpas.