– Ulbmil lea čalmmustahttit sámi dearvvašvuođabálvalusaid organiserema Finnmárkkubuohcciviesus HF, čilge hálddašeaddji direktevra Eva Håheim Pedersen.
Klinihkka galgá doaimmahuvvot njuolga direktevra doaimmahusa vuolde.
– Klinihkas galget leat bálvalusat mat gusket somatihkkii, psyhkalaš dearvvašvuhtii ja gárrendillái, dulkonbálvalussii ja Sámi našuvnnalaš gealboguovddáš- psyhkalaš dearvvasvuođasuddjen ja gárrendilledikšui (SÁNAG). SÁNAG:s lea našunála ovddasvástádus mii guoská dutkamii, ovdánahttimii ja gealboloktemii sámi álbmoga psyhkalaš dearvvašvuođas ja gárrendili ektui Norggas, čilge Eva Håheim Pedersen.
Sámi gelbbolašvuohta jođiheapmái
Finnmárkkubuohcciviesus lea ovddasvástádus sihke našunála ja báikkálaš bálvalusaid addit sámi álbmogii.
Direktevra oaivvilda ahte dat ii leat doarvái bures boahtán ovdan ahte nu lea dan ođđa bajit organiseremis Finnmárkku Dearvvašvuođas (HF), ja čujuha dan sámi gelbbolašvuhtii mii ii leat oassin jođihanjoavkkus dál.
– Sámi gelbbolašvuohta jođihanjoavkkus lea dehálažžan vai sámi álbmot oažžu seammá árvosaš spesialistadearvvašvuođabálvalusa, mii lea heivehuvvon sámi pasieanttaid giela ja kultuvrralaš duogážii, lohká son.
Cuoŋománu 29.beaivvi ja 30.beaivvi bovde son Finnmárkkubuohcciviesu stivrra dahkat mearrádusa mas sámi dearvvašvuođabálvalusain lea bajit organiseren dearvvašvuođafitnodagas.
Ođasmahtti
Son ávžžuha ásahit sierra sámi klinihka, vai čalmmustahttá sámi dearvvašvuođabálvalusa ovddasvástádusa Finnmárkkubuohcciviesus, ja ahte doaimmahusat mat gusket somatihkkii/spesialistadoavtterguovddážii ja psyhkalaš dearvvašvuođasuddjemii ja gárrendillái, psykiátralaš guovddáš Gaska-Finnmárkkus (GPG), dulkonbálvalus, ja oahppan ja máhttinguovddáš galget leat oassin dan ođđa klinihkas.
– Klinihkka lea ođasmahtti go somatihkka, psyhkalaš dearvvašvuođasuddjen ja gárrendilli biddjo ovtta klinihkkii. Ásaheamis ferte ovdánahttit ovttasbargošiehtadusaid klinihkaid gaskkas, nu ahte šaddá buorre pasieantadoaibma ja ovttasbargu klinihka resurssaid gaskkas, lohká Eva Håheim Pedersen preassadieđáhusas.
Direktevra ávžžuha ahte ođđa klinihka almmolaš namma šaddá Sámi Klinihkka.
Namma deattuha ahte lea klinihkka mas lea erenoamáš fokus sámi dearvvašvuođabálvalusaide, seammás go lea fálaldat muđuid ge sámi álbmogii.
Namma SÁNÁG lea bures sajáiduvvan ovttasbargoguimmiid gaskkas guovllus, našunálalaččat ja riikkaidgaskasaččat, ja geavahuvvo ossodatdásis.
