Ođđa sámi buvttadanfitnodat «Uksi Production» lea dál ásahuvvon.
– Dát lea lunddolaš joatkka mu eallinbargui, muitala easkkavuođđuduvvon buvttadanfitnodaga Uksi Production nubbi oamasteaddji, Jussi Isokoski, preassadieđáhus.
Ánssáša buvttadanfitnodaga
Peassadieđáhusas boahta ovdanahte dán rádjái Tuupa Records, man Isokoski lea vuođđudan 2004:s, lea buvttadan goasii visot Suoma beale almmustuvvan sámemusihka. Dál lea ulbmil sirdit Uksi vuollái buot Tuupa sámeartisttaid buvttadeami ja čatnat ođđa artisttaid.
– Tuupa lea sturron eandalitge dáhpáhus- ja konseartateknihka oasil. Sámemusihkkii láktasit nu ollu iešvuođat, mat eai gávdno váldoservodaga musihkas. Danin sámemusihkka gáibida ja ánssáša buvttadanfitnodaga mii lea aitto dan várás huksejuvvon, Jussi muitala Uksi vuođđudeamis. Son čállá maid preassadieđáhusas ahte bargu lea oahpis, danin go Isokoski lea bargan sámekultuvrra ovdii jo guoktelot jagi, ja dán barggu ovddas sutnje leage mieđihuvvon Áillohaš-bálkkašupmi 2015:s.
Viidu
Buvttadanfitnodat, mii lea ceggejuvvon ovttas Kati Erikseniin, áigu viidut maid eará mediasuorgái, nu mo spealuide ja ealligovvii.
– Sámekultuvra geasuha, ja mii sápmelaččat fertet ieža deavdit dien dárbbu, muđuid earát barget dan, lohká Eriksen.
Gelbbolašvuohta
Kati Eriksen diehtá mas hállá, danin go son lea jo 1990-logus bargan sámekultuvrra stereotyhpalaš boasttogeavaheami vuostá. Dan rájes Eriksen lea doaibman sámegiela ja kultuvrra ovddideaddjin sihke eaktodáhtolaš bargun servviin ja sierra bargoaddiid bálvalusas. Dál Eriksen jođiha golbma prošeavtta, main okta lea Sámi musihkkaakademiija.
Uksi Production Ltd doaibmá sámi musihkka ja media buvttadanfitnodahkan. Fitnodaga ruoktobáiki lea Ohcejohka ja dan oamasteaba Jussi Isokoski ja Kati Eriksen. Uksi artistakatalogas ja boahttevaš prošeavttain almmuhuvvo maŋŋelabbos.
