-Almmuhus-
-Almmuhus-
SMÁVVAOĐĐASATČohkke Oslo sámi dearvvašvuođa bargiid

Čohkke Oslo sámi dearvvašvuođa bargiid

-

-

Sámediggi lea juolludan 360 000 ruvdnosaš doarjaga Oslo Sámi Vissui. Doarjja lea ovdaprošeavtta váste man ulbmil lea ásahit sámi dearvvašvuođafierpmádaga.

Oslo Sámi Viessu lei ohcan doarjaga go áiggošii ásahit sámi dearvvašvuođafierpmádaga Osloi ja Oslo birrasis. Sámediggi lea dál juolludan 360 000 ruvdnosaš doarjaga ovdaprošektii, čállá Sámediggi preassadieđáhusas.

– Fierpmádat galgá veahkehit duddjot oktavuođaid suohkana sámi dearvvašvuođabargiid ja dearvvašvuođadoaimmahagaid gaskkas mat barget dan ovdii ahte sámi pasieanttat ožžot ovttaárvosaš dearvvašvuođabálvalusaid. Oslo sámi dearvvašvuođafierpmádaga ulbmil lea áimmahuššat sámi pasieanttaid ja sin lagasolbmuid, aktiivvalaččat gaskkustit dieđuid, ja ovdánahttit prošeavttaid ja ovttaárvosaš dearvvašvuođabálvalusaid, muitala Myrnes Balto.

Ohcalan dearvvašvuođabálvalusaid

– Oslos ja Oslo guovllus leat ollu sápmelaččat, sihke dakkárat geat orrot doppe ja dakkárat geat leat doppe muhtun áiggi, lohka sámediggeráđđi Runar Myrnes Balto (NSR).

Myrnes Balto lohká Sámedikki diehtit ahte sámi pasieanttat leat ohcalan bálvalusaid mat vuhtii váldet sámi giela ja kultuvrra. Dat prošeakta man Oslo Sámi Viessu álggaha dál lea dehálaš lávki sápmelaččaid dearvvašvuođabálvalusaid buorideamis Oslos.

Lea dárbu  dearvvašvuođabálvalusaide

– Mii oaidnit ahte lea dárbu nannet sápmelaččaid dearvvašvuođabálvalusaid Oslos ja Oslo lahkosiin, ja Oslo Sámi Viessu ánssáša rámi go álggaha fierpmádaga mii lea ávkkálaš dearvvašvuođabargiide, ja nu maiddái sámi pasieanttaide ja sin lagasolbmuide, dadjá sámediggeráđđi Runar Myrnes Balto (NSR).

Sámi dearvvašvuođafierpmádat lea veahkkin ovttaárvosaš dearvvašvuođabálvalusaid oččodeamis sámi álbmogii  ja maiddái sámi álbmoga dearvvašvuođa- ja fuolahusbálvalusaid fágaovdánahttimis ja gelbbolašvuođaloktemis, čállá vel Sámediggi preassadieđáhusas.

-Almmuhus-