Máŋga nuoraidbellodaga leat maŋemus vahkkuid dorjon vuosttaldemiid ruvkebázahusáššis Førdevuonas. Dál áiggošii Norgga Sámiid Riikkasearvvi nuoraidlávdegoddi čohkket eará nuoraid vuosttaldit Nussira ja Gumpenjuni ruvkenuoskideami.
Máŋga nuoraidbellodaga leat maŋemus vahkkuid dorjon vuosttaldemiid ruvkebázahusáššis Førdevuonas. Dál áiggošii Norgga Sámiid Riikkasearvvi nuoraidlávdegoddi čohkket eará nuoraid vuosttaldit Nussira ja Gumpenjuni ruvkenuoskideami.
Norgga Sámiid Riikasearvvi nuoraidlávdegoddi (NSR-N) atná árvvus nuoraidbellodagaid ráinnas vuonaid barggu, ja sávvá seamma stuora beroštumi mearradeponiijai ja ruvkkiid vuostá Riehpovuonas Fálesnuoris.
Nuoraid boahtteáigi
– Ruvki ja mearradeponiija lea áittan min boahtteáigái, ja danne lea maid dehálaš ahte nuorat dorjot vuosttaldemiid ovttas ja barget fárrolaga ráinnas vuonaid ovddas. Leat mii nuorat geat galgat ássat dáppe boahtteáiggis, lohká NSR-N jođiheaddji Ánde Trosten.
– Lean oaidnán ahte AUF lea ipmirdan juoidá maid Bargiidbellodat ii leat ipmirdan, ja sávan ahte dás maŋos ožžot bellodaga rievdadit oainnus mearradeponiija birra, dadjá Trosten.
Adde lobi
Birasgáhttendirektoráhtta attii juovlamánus ruvkeálggahanlobi Nussiris ja Gumpenjunis Fálesnuoris. Vaikko vel ruvki galgá álggahuvvot boazodoalu dehálaš guohtunguovlluide, ja vel go addet lobi gurret ruvkebázahusaid Riehpovutnii – mii lea luossavuotna juste seamma go Førdevuotna.
Bovden Kárášjohkii
Njukčamánu 3. beaivvi meannuda sámediggi ášši 06/16 Ruvkedoaibma Nussiris ja Gumpenjunis, ja dan oktavuođas lea NSR-N váldán oktavuođa jođiheddjiiguin AUF, Sosialistisk Ungdom, Grønn Ungdom ja Rød Ungdom ja ávžžuhan sin boahtit Sámediggái Kárášjohkii, ja čuovvut Sámedikki dievasčoahkkima.
– Dasa lassin sáhttet nuoraidbellodagat oaidnit ja oahppat eanet sámepolitihka birra ja movt sámiid parlameanta doaibmá, lohká Trosten.
– Lea hui buorre jus nuoraidbellodagat háhket oahpu ja ipmárdusa makkár váikkuhusat leat ruvkedoaimmain sámi ealáhusaide ja sámi servvodahkii, loahpaha Trosten.
