Čohkke eamiálbmot sosiálafágabargiid Áltái

Geassemánus lágiduvvo stuora riikkaidgaskasaš eamiálbmot sosiálafágalaš konferánsa, «ALTA 2017».

Konferánsa lágiduvvo Romssa universitehtas Álttás, ja doppe galgá sierra fágabeaivi sin váste geat fealttas barget.

– Erenoamáš vejolašvuohta

Lea njealját háve go konferánsa lágiduvvo, ja konferánsa lea sidjiide geat barget dearvvašvuođa- ja fuolahusbálvalusas, sosiála barggus, mánáidsuodjalusas dahje eará veahkke- ja čálgobálvalusain.

Konferánsa lea ovdal lágiduvvon Hawaiias, Austrálias ja Kanadas.

Mánáidsuodjalusa ja sosiálabarggu instituhttajođiheaddji Nina Hermansen čilge ahte leat čeavlát go leat nagodan oažžut ná stuora fágakonferánssa Áltái ja Finnmárkui.

Son lohká dát konferánsa addá regiovnna fágafeltii vejolašvuođaid.

– Ii leat dávjá go mii beassat searvat dákkár stuora konferánsii gos beassat digaštallat fága ja bargovugiid mielbargiiguin miehtá máilmmi. Danne lea nu erenoamáš vejolašvuohta midjiide, man mii galgat heivehit min regiovnna fágafeltii, lohká Hermansen preassadieđáhusa bokte.

Servodatrievdadusat váldofáddán

Christina Hætta lea prošeaktajođiheaddji ja son muitala ahte konferánssa váldofáddá lea dan birra movt servodat, dálkkádat, ekonomiija, gulahallan ja teknologiija váikkuhit álgoálbmotguovlluid miehtá máilmmi, ja movt heivehit rievdadusaide.

Konferánsaprográmmas leat 150 báikkálaš ja internašunála logaldallit, geain lea duogáš sosiálabarggus, dutkamis, politihkas dahje fealttabarggus.

– Mii oaidnit ahte leat sullásaš hástalusat min fágasuorggis, leaš dál Girkonjárggas dahje Austrálias. Erohus leat min bargovuogit. Jáhkán fágafealta oažžu olu dákkár deaivvadeamis, gos vásáhusaid, bargovugiid ja dutkamiid sáhttá juogadit, čilge Hætta preassadieđáhusas.

Heivehuvvon fágafeltii mii lea guovllus

Hætta čilge ahte galget leat máŋga parallealla sešuvnna konferánssas, ja oasseváldit besset ieža mearridit makkár fáttáid birra háliidit gullat.

Fáttát leat boarásnuvvama birra ruovttus, veahkaválddálašvuohta lagas birrasis, seksuála illasteapmi mánáidgárddiin, iešsorbmen, árbevirolaš máhttu, luonddu ealáhusat, ja NAV:i guoskevaš fáttát nu go nuorat, bargguhisvuohta, báikkálaš čálgoortnegat, máŋggagielalašvuohta ja gárrenmirkogeavaheapmi.

– Nubbi beaivi lea heivehuvvon fágafeltii go mii diehtit ahte lea divrras ja váldá áiggi leahkit konferánssas golbma beaivvi.

Lágideaddjit leat maid lágidan kultuvrralaš prográmma konferánssas.

Bearašmárkanat, Elle Marjá Eira konsearta, juoigankursa, «Sameblod» filmma čájeheapmi ja dáidda- ja duodječájáhusat galget leahkit oaidnimis dan vahkku.

Stuora internašunála beroštupmi

Lágideaddjit muitalit ahte lea stuora beroštupmi konferánsii, sihke riikkaidgaskasaččat ja ruovttus.

Muhto sii oidnet ahte sáhttet vel viidábut olahit fágabirrasiin.

– Leat dieđihuvvon oasseváldit Kanadas, Ođđa Selánddas, Austrálias, USA:s, Taiwanas, Kiinnas, Columbias, Nicaraguas, Norggas, Ruoŧas, Suomas ja Ruoššas. Muhto mii eat leat vel olahan doarvái bures min iežamet regiovnna fágafealttas. Mii juohkit dál dieđuid konferánssa birra, masa lea dieđihanáigi miessemánu 1. beaivvi, lohká Hætta.