-Almmuhus-
OĐĐASAT Čogget ruđa sidjiide geain leat heaju­mus vejolaš­vuođat birget boras­dávddain

Čogget ruđa sidjiide geain leat heaju­mus vejolaš­vuođat birget boras­dávddain

-

-

Kárášjogas váilot ruhtačoaggit, muhto báikkálaš searvi lea gávdnan čovdosa váttisvuhtii.

Golbma njealji Norgalaččas geain lea borasdávda cevzet, muhto statistihka duohken leat stuora erohusat. Dat gávdnojit ain borasdávddat main unnán olbmot birgejit. Borasdávda geahppáin dahje vuovdačolgarávssás leat ovdamearkkat dákkár dávddaide. Dušše guovttis logi olbmos geat ožžot borasdávdda geahppáide ja okta logis gii oažžu borasdávdda vuovdačolgaráksái ceavzá.

– Kreftforeningen čoaggá dán jagi ruđa ruhtadit dutkama dain dávddain vai eambbosiin livččii vejolašvuohta ceavzit ja vai pasieanttat ja oapmahaččat oččoše buori ovdamorraša, muitala Elisabeth Kneppen-Strømeng Olsen searvvis «Forening for kreftberørte i Karasjok» preassadieđáhusas maid leat almmuhan.

«Krafttak mot kreft» lea jahkásaš ruhtačoaggin maid Kreftforeningen doaimmaha.

Čogget ruđa fitnodagain

Kárášjogas lea leamaš váttisvuohtan gávdnat ruhtačoggiid, ja danne lea «Forening for kreftberørte i Karasjok» ožžon ovddasvástádusa čoaggit ruđa Kárášjogas. Sis eai leat doarvái návccat vázzit ja čoaggit ruđa, nu ahte sii leat ferten fuobmát eará vuogi čoaggit ruđa.

– Mii leat bidjan ruhtabovssaid fitnodagaide ja eará almmolaš báikkiide Kárášjogas, nu go Rema 1000, Coopii, Cirkle K:ii, YXai, Scandicii, Karasjok campingii, Kjells Kafeai, bátnedivššohahkii, ráđđevissui, Sápmi apotehkii, Sport1ai, Sápmi parkii, girjerádjosii, Delta i Formii ja Frisørkrokenii, muitala Olsen.

Leat jo álgán

Ruhtačoaggin lea jo álggahuvvon Kárášjogas, ja ruhtabovssat leat jo eanas fitnodagain. Sullii golmma vahkku geahčen, njukčamánu 12. beaivvi vižžet sii fas bovssaid ja sáddejit ruđa Kreftforeningenii.

– Mun sávan ahte ollu olbmot dorjot ruhtačoaggima go dát lea dehálaš ášši ja ahte bovssat bállejit ráfis doppe gos dat leat. Dat lea maid vejolaš vippset doarjaga njuolga Kárášjoga «Krafttak mot kreft» nummarii mii lea 471088, dadjá Olsen preassadieđáhusas ja hástala vel olbmuid geain livčče hállu čoaggit ruđa gaskkal njukčamánu 13. beaivvi ja 15. beaivvi váldit oktavuođa suinna.

- Advertisement -
-Almmuhus-