-Almmuhus-
-Almmuhus-
OĐĐASAT – Čoggen 30 gilo luopmániid ovtta balssas

– Čoggen 30 gilo luopmániid ovtta balssas

-

-

Henrik Andersson, Överkalixas Norrbottena leanas lea gávdnan earenomáš olu luopmániid dan geasi ja muitala ahte leat eanet luopmánat go leat leamaš máŋgga jahkái. Luopmánat leat maid láddan árabut go dábálaččat čilge son. 

Son gullá Jiellevári vuovdečerrui ja orru Pålkemis moadde miilla oarjjabealde Överkalixa Norrbottena leanas. Dán guovllus son maid čoaggá luopmániid ja dán jagi son lohká earenomáš buori muorjejagi.

– Dat leat nu olu muorjjit meahcis, luopmánat leat láddan árabut go dábálaččat ja manai johtilit go láddagohte. Dáppe leat leamaš báhkat mat leat dahkan ahte buot luopmánat leat láddan, čilge son. Orru nu ahte šaddet maid olu sarridat ja gáiccamuorjjit dán guovllus čilge son. 

Diibmá ii lean mihkkege

Henrik muitala ahte lea somá ahte dakkár goavvijagis leat goit luopmánat šaddan.

– Diibmá lei jur guorus meahcin go lei nu goikkis. Mun muittán ii gávdnon mihkkege go galgen lubmet. Muhto dan jagi lean čoaggán nu olu. Mun lean beassan deavdit buot galbmaskábiid luopmániiguin ja go čoggen ovtta balssas 30 gilo luopmániid, de ipmirda ahte dál leat olu luopmánat, moddjá son. 

ERENOMÁŠ OLU: Henrik Andersson lohká son lea gávdnan olu luopmániid dan jagi. Son lea deavdán buot galbmaskábiid. Govva: Priváhtta 
ERENOMÁŠ OLU: Henrik Andersson lohká son lea gávdnan olu luopmániid dan jagi. Son lea deavdán buot galbmaskábiid. Govva: Priváhtta 

Koronadili

Henrik mearkkaša maid ahte eanet báikkálaš olbmot leat meahcis lubmeme ja ahte nuorat maid leat vuolgán meahccái lubmet. 

– Mun lean oaidnán olu nuoraid maid meahcis lubmeme.  Ja mun dieđan ahte leat koronadili dihte čoaggime go lea nu bargguhisvuohta dan áiggi. Dat lea buorre bargu ja maid dienas nuoraide, lihkus leat luopmanat šaddan vai nuorain lea bargu. 

Dego dolin

Son muitá ieš go lei nuorra ja lubmii ja nu dinii ruđaid maiguin sáhtii oastit iežas vuosttáš mohtorsihkkela.

– Dal olbmot lubmejit ja vuvdet ja nu ožžot dietnasa, dat oidno buot interneahta vuovdinsiidduin ahte ollosat vuvdet luopmániid. Mun ieš lean vuovdán dohko Stockholmii,  čilge Henrik. 

Son maid lohká ahte lea leamaš buorre báikkálaš olbmuide ahte olgoriikka čoaggit eai leat ovdal dal beassan boahtit.

Olgoriikka čoaggit

Thai-riika muorječoaggit eai leat beassan boahtit Ruŧŧii ja Supmii nugo lávejit, koronadili dihte. Muhto sotnabeaivvi bođii diehtu Ruoŧa bargodepartemeanttas ahte sii leat addán lobi olgoriikka čoggiide boahtit Ruŧŧii sierra eavttuin dieđiha Ruoŧa Radio Ekot. 

Ruoŧa fitnodagat fertejit ordnet buot thai-riika čoggiide geat bohtet Ruŧŧii sihke orrunsaji ja maid buot mátkkiid. Sii eai sáhte ila baskkusis orrut jus koronadávda njoammu. Ruoŧa fitnodagat šaddet maid máksit unnimusat 22 049 ruvnna mánnobálkán olgoriikka thai čoggiide. 

– Dáppe leat leamaš dušše báikkálaš olbmot jekkiin. Muhto ikte oidnen daid vuosttáš thai-riika čoggiid geat bohte jeaggái. Dat lea ávkin leamas báikkálaš olbmuide ahte dušše min leat beassan čoaggit, lohká Henrik. 

OLU LUOPMÁNAT: Henrika mielas leat luopmánat suddan árabut go dábálaččat. Govva:Priváhtta. 
OLU LUOPMÁNAT: Henrika mielas leat luopmánat suddan árabut go dábálaččat. Govva:Priváhtta. 

Vuolida hatti

Henrik Anderssona mielas lea suddu go olgoriikka čoaggit bohtet go dat vuolida hatti murjjiin báikkálaš olbmuide geat háliidit ávkkástallat báikkálaš luonddu. 

– Dat vuolida hatti luopmániin. Ja dal go eai leat leamaš nu olu olgoriikka čoaggit de loktanit hattit maid luopmániin go olbmot háliidit oastit ja dal lea buorre nuoraide geain eai leat barggut dal. Sii leat šaddan nu viššalat čoaggit, oainnán dušše iežan bártni gii lea meahcis dal čoaggime ja mun ieš ge lean fas vuolgime dál, lohká son.

- Advertisement -
-Almmuhus-