-Almmuhus-
OĐĐASATČogge 239 kg báhtteriid ja vuite fylkkagilvvu

Čogge 239 kg báhtteriid ja vuite fylkkagilvvu

-

-

Billávuona mearrasámi bajásšaddanguovddáža 4. klássa oahppit čohkkejedje 239,2 kg báhtteriid ja vuite ge «Batterijakten 2018» fylkkagilvvu Finnmárkkus.

Cuoŋománu leat 14 500 njealjátluohkáid oahppit Norggas searvan báhtterčohkkengilvui «Batterijakten 2018» man Miljøagentene lágidii. 

Sii čohkkejedje golmma vahkkus oktiibuot 111 adnon báhtteriid.

Finnmárkkus leat 12 skuvlla searvan dan jagáš báhtterčohkkengilvui.

Daid gaskkas leat guovtti sámi suohkana skuvllat searvan gilvui, Billávuona mearrasámi bajásšaddanguovddáš ja Deanus fas Sieiddá skuvla.

 

Vuite fylkkagilvvu

Billávuona mearrasámi bajásšaddanguovddáža  4. luohkás serve vihtta oahppi gilvui. Sii čohkkejedje oktiibuot measta 240 kg báhtteriid ja faskejedje fylkkavuoittu dainna meriin.

Gaskamearálaččat čohkkii juohke okta sis 47,84 kg báhtteriid.  

Sieiddá skuvllas serve 12 oahppi ja čohkkejedje oktiibuot 190,5 kg báhtteriid, dat mearkkaša ahte juohke okta sis čohkkii gaskamearálaččat 15,88 kg adnon báhtteriid.

 

Olu šlivgejuvvo ain ruskalihttái 

– Báhtterčohkken lea skuvlaakšuvdna man ulbmilin lea oahpahit ohppiide buriid birasdábiid ja bidjat fuomášumi birasgáhttengažaldagaide skuvllain.  Vaikko Norggas leat čeahpit čohkket ja sáddet ođasmahttimii elektrovnnalaš biergasiid, de leat  ain olu smávva elektrovnnalaš diŋggat mat gevvet ruskalihttái. Danne lea Miljøagentene maŋemus guhtta jagi lágidan báhtterčohkkengilvvu, čilge Miljøagentene prošeaktajođiheaddji, Rasmus Norsted  preassadieđáhusas.

 

Leamašan áŋgirat 

Norsted čilge ahte báhtterčohkkenkampánja lea álkes vuohki njealjátluohkáhasaide oahpahit birasgáhttema birra,  ja kampánjja bokte lea maid álki ohppiide searvat birasgáhttendoaimmaide. 

Dán jagi serve Norggas badjel 700 oahppi gilvui. Oahppit leat áŋgirit ohcan ja čohkken báhtteriid sihke olgun ja siste.

Oahppit leat earret eará vázzán viesuid mielde ja čohkken báhtteriid, sii leat heŋgon plakáhtaid ja ávžžuhan olbmuid addit sidjiide adnon báhtteriid. 

 

Časke diimmá olahusa 

Diibmá čohkkejedje oahppit 80 tonna báhtteriid.

Dan olahusa gal dan jagi časke olu garrasit, go nagodedje golmma vahkkus čohkket 111 tonna báhtteriid mat sáddejuvvojit ođasmahttimii. 

– Mánát leat leamašan áŋgirat. Olusat leat geavahan buot sin friddjaáigi čohkket adnon báhtteriid, ja muhtumat leat maid sávvan riegádanbeaiskeaŋkan oažžut adnon báhtteriid, muitala Norsted. 

 

Vuoittut

Dán jagi leat Miljøagentene juohkán 30 000 ruvnno vuoitun guovtti skuvlii.

Goappešat riikavuoitoskuvllat leat Trøndelága fylkkas.

Dan guovtti skuvlla oahppit leat čohkken oktiibuot badjelaš golbma tonna báhtteriid gilvoáigodaga.

Dasa lassin ožžot maid juohke fylkka fylkavuoitit vuoittu.

Fylkavuoitit ožžot šaddogilvinrusttegiid,  gilvagiid, gilvinkássaid, «divrehotealla» ja diploma. 

 

-Almmuhus-