-Almmuhus-
-Almmuhus-
MAGASIIDNA Čoaggilii 65 lihtera murjiid veahkkebargui

Čoaggilii 65 lihtera murjiid veahkkebargui

-

-

Mama Saras lea vuot badjánan bargomokta. Son lea oanehis bottas dinestan 3000 ruvnnu veahkkebargui.

Gunhild Berit Sara Buljo murje juohke čavčča.

Dán jagi lea čoaggán masá 100 lihtera joŋaid ja luopmániid, 65 lihtera skeŋkii veahkkeorganisašuvdnii.

 – Álggos čoggen alccen ja olbmuide geaidda áigon skeŋket veahá murjjiid. Dan maŋŋel fuomášin ahte dáinna vugiin han sáhttá dinet ruđaid Mama Sara skuvlaprošektii, dadjá son.

 

Vuoiŋŋastii guokte mánu

Gunhild Berit lea Mama Sara Education Foundation veahkkeorganisašuvnna vuođđudeaddji.

Son lea olu fámuid ja áiggi geavahan veahkehit masai-álbmoga Afrihkás.

Olu bargu váibada, ja danin dovddai loahpas ahte ferte vuoiŋŋastit.

 – Mun lean vuoiŋŋastan guokte mánu. Dál dovddan iežan nu sávrin ja mus lea hui buorre mokta. Nu guhká go lean dearvvaš, de gal veahkehan buriin mielain, lohká Buljo.

 

Skuvlaprošeakta loahpahuvvo

Mama Sara veahkkeorganisašuvdna lea huksen skuvlla gos máŋga čuođi masai-máná leat jo logeneari jagi gazzan oahpu.

Dasa lassin leat huksen mánáide gievkkana ja boradanlanja, oahpaheddjiide ges leat huksejuvvon viesut.

Skuvlaprošeakta gárvána dán jagi, loahppabargui gullá hukset gárvvisin dearvvašvuođakantuvrra ja ordnet čáhcetáŋkkaid.

 – Mii fertet maiddái oastit stuoluid, bevddiid ja eará rusttegiid. Dása mannet ruđat maid dinejin muorječoaggimis, čilge Buljo.

 

Beivviid olgun

Rupmašii lea diehttelasat hui buorre vánddardit luonddus, ja dovdu dáidá vel buoret go diehtá ahte muorječoaggimin veahkeha gefiid.

 – Alccen gal čoggen murjjiid hui gulul, muhto fárta gal buollái go Mama Sarai čoaggigohten. Mun šadden bákkus vuolgit olggos juohke beaivvi, ja dat gal lea leamaš hui buorre. Mus leamaš niesti fárus ja lean káfestallan olgun juohke beaivvi, muitala Gunhild Berit Sara Buljo.

 

Gunhild Berit Sara Buljo čoaggilii vuos alcces ja muhtin ustibiidda murjiid, dan maŋŋel čoaggigođii murjiid maid sáhtii vuovdit. Dietnasa skeŋkii Mama Sara veahkkeorganisašuvdnii. Čájáhusgovva: Kari Lisbeth Hermansen

 

Bargu gal ii noga

Mama Sara illuda sakka dassážii go skuvlaprošeavttain gerget, muhto son ii loga gal barggu dasa nohkat.

 – Mii čoaggit ruđaid 50-60 mánnái vai sii besset skuvlla vázzit. Dasa lassin leat jo guovtti geafes gilis váldán minguin oktavuođa, doppe lea stuora dárbu hukset skuvlalanjaid. Lea stivrra duohken mearridit maid vuoruhit maŋŋel go skuvlaprošeakta loahpahuvvo. 

Buljo muitala maiddái stirra doibmii čoaggimin ruđaid. 

 –Mii lávet rievtti mielde juohke jagi vuovdit vurbbiid, muhto nu ii gártan dán jagi go lean buohcan, čilge Buljo.

 

Mama Sara nu guhká go eallá

Son ii leat šat Mama Sara Education Foundation organisašuvnna hálddahuslaš jođiheaddji, muhto veahkkebargguin gal joatká nu guhká go veadjá ja Afrihkkái pláne maid dollet go skuvlaprošeakta nohká.

 – Dál lean dušše Mama Sara, ja dan gal lea nu guhká go ealán. Stivrii lean dieđusge muitalan ahte veahkehan iluin nu guhká go bisun dearvvašin.  Muorječoaggin čájeha ahte lea dušše olbmo fuomášupmi mii bisseha min. Mii sáhttit nu álkes vugiin čohkket ruđaid gefiide, dadjá Gunhild Berit Sara Buljo.

 

Gunhild Berit Sara Buljo muitala ahte Mama Sara skuvlaprošeakta gárvána dán jagi, dalle áigu fas galledit masai-álbmoga. Vuorkágovva: Nils Johan Vars

- Advertisement -
-Almmuhus-