Davvi-Norgga universitehtabuohcceviesus ii leat ráđđi oastit váibmokomprešuvnamašiinnaid. Danin čoaggigohte ambulánsabargit ruđa ja ulbmil lea oastit rusttegiid miljovnna ovddas.
Davvi-Norgga universitehtabuohcceviessu luoikkahii «Lucas» nammasaš váibmokomprešuvdnamašiinnaid beannot jagi go čađahedje geahččalanprošeavtta, muhto daid leat dál máhcahan buvttadeaddjái.
Romssa, Hárstták ja Áhkánjárgga ambulánsabargit vásihedje váibmo- ja geahppáidgádjun rusttega nu ávkkálažžan ahte leat álggahan ruhtačoaggima vai besset oastit mašiinnaid ambulánssaide.
Davvi-Norgga universitehtabuohcceviesus oainnat ii leat várri ruhtadit rusttegiid, sii galget oainnat seastit unnimusat 180 miljovnna ruvnnu dán jagi.
Lagabui 600 000 ruvnnu
Váibmokomprešuvdnamašiidna sáhttá geavahuvvot ambulánssas vuojedettiin ja dat sáhttá danin gádjut olbmuid geain váibmu bisána.
Sihkarvuođa geažil oainnat ii leat vejolaš čađahit váibmo- ja geahppáidgádjuma ambulánssas vuojedettiin buohccevissui dahje ambulánsahelikoptera lusa.
Váibmokomprešuvdnamašiidna máksá gaskal 125 000 ja 170 000 ruvnnu. Ambulánsabargiin lea áigumuš čoaggit miljovnna ruvnnu, ja dássážii leat čoaggán lagabui 570 000 ruvnnu.
– Golbma vuosttaš mašiinna maid suitit oastit galget geavahuvvot Romssas, Hársttáin ja Áhkánjárggas. Mii geavahit buot ruđaid váibmokomprešuvdnamašiinnaide ja oastit maiddái eará ambulánssaide rusttegiid. Mii háliidivččiimet ahte buot UNN ambulánsastašuvnnain galggašii sierra váibmokomprešuvdnamašiidna. Muhtin gielddain čađahit ieža ruhtačoaggimiid sihkkarastin dihte mašiinna, čállet ruhtačoagginakšuvnna vuođđudeaddjit Facebookas.
