Olu cizážat rahčet dálvit go lea váttis gávdnat biebmu muohttaga vuolde. Jus cizážat galget birget dálvit, de dárbbašit olbmuid veahki dan dahkat. Cizážat birgejit bures buollašis nu guhká go dain lea doarvái biebmu.
Biebmovátnivuohta lea stuorámus áitta cizážiid birgemii dálvit go muohta gokčá cizážiid biepmu. Danin lea dehálaš ahte olbmot veahkehit cizážiid birgema jus bibmet cizážiid. Lea maid hávski geahčadit cizážiid go girddašit olgun šattogárddis, čállá hageglede.no preassadieđáhusas.
Jus biebmat lottiid, fuolat ahte it atte daidda nisoláibbi, guhppon láibbi dahje gáhkuid main lea sohkar. Heŋges buhtes biebmolávddiid lahka muoraid ja miestagiid, amas boraloddi dahje bussá fuomáš daid. Cizážat dárbbašit eanemusat buoiddi, nu go beaivvášlieđđesiepmaniid, neđiid dahje buoidebulláid maid sáhtát ieš ráhkadit.
Ná ráhkadat buoidebullá: sáltekeahtes buoiddi maid šolgadat, neđiid, beaivvášlieđđesiepmaniid, hávvarrivnniid ja eará siepmaniid. Go buoidi lea šolgan golgi vuodjan, leike dan lihttái, vaikko gáhkkoforbmii, ja fiero cizášherskuid. bija velá báddebihtá dohko vai sáhtát dan heŋget oaksái. Go buoidi lea stirdon, leikes velá báhcán vuoja amas siepmanat láhppojit das eret. Muitte go biebmagoađát lottiid, de berret olles dálvvi daid biebmat.
