Jus leat leamaš City Scenes mannan vahkkoloahpa, bivdá Álttá suohkan du váldit koronaiskosa.
Álttá suohkanis duođaštuvvui vuossárgga iđida ođđa njoammun. Dát olmmoš bargá City Scenes. Suohkan bivdá buohkaid geat ledje City Scenes lávvordat eahkeda ja sotnabeaivvi čuovganeapmái mannat 10 beaivásaš erremii ja váldit oktavuođa suohkana testenjoavkkuin.
– Mii bivdit maid buohkaid geat ledje Barillas sotnabeaivvi eahkeda válddihit iskosa ja leat diđolaš dávdamearkkaid ektui. Sii eai dárbbaš erremii, čállá Álttá sátnejođiheaddji Monica Nielsen preassadieđáhusas.
Suohkan navdá ahte lea muhttašuvvan virus ja ahte lea deltavariánta. Olmmoš geasa lea njommon lea lagasoktavuohta ovttain geas lea leamaš njoammun ja lea leamaš erremis. Errenáigi lei čađahuvvon, ja sotnabeaivvi dovdagođii olmmoš dávdamearkkaid ja diŋgui koronaiskosa.
Álttás leat vuossárgga 6 duođaštuvvon njoammuma ja leat sullii 60 olbmo erremis.
