Lulli- Suoma sámesearvi City-Sámit rs lea duppalasten miellahttologu moatti jagis. Dál leat válljen ođđa stivrra, ja stuora niehkun lea oažžut sámekulturguovddáža Helssegii.
Bearjadaga City-Sámit -searvvi jahkečoahkkin válljii ođđa stivrra. Pentti Pieski joatká sátnejođiheaddjin jo njealját áigodaga. Stivrii bohte maiddái golbma ođđa lahtu. Várresátnejođiheaddjin doaibmái stivrii goalmmát jagi válljejuvvon Juho Keva. Ruhtadoallin joatká Keijo Nuorgam ja čállin válljejuvvui Minna Moshnikoff. Eará lahtut leat Inka Musta ja Mari Korpimäki ja várrelahtut Hanna Helander ja Heikki Mustonen.
– Mii leat máŋgga mihttáriin Suoma stuorámus sámesearvi ja dát gáibida stivrras čehppodaga. Searvedoaimma rolla sámegiela ja -kultuvrra bajásdoallin ja gárgeheaddjin lea ain eanet šaddan mearkkašahttin maŋimuš jagiid, čállá Pentti Pieski preassadieđáhusas.
Duppaliid
Ođđa stivrra stuorui guvttiin lahtuin ja dál das leat sátnejođiheaddji, vihtta aitosaš lahtu ja guokte várrelahtu. Searvvis leat duppalasten miellahtuid moatti jagis, ja dál leat sis 312 miellahtu.
Maŋemus vahkuid oaidnán
Pentti Pieski čállá viidáseappot ahte maŋimuš vahkuid politihkalaš mearrádusat čájehit, ahte searvvis lea stuorra dárbu deattuhit olgguldas dieđiheami ja ovddugohcima. Easkka válljejuvvon stivra mearridii čoahkkimisttis bearjadaga válljet dán váras iežas bargojoavkku, masa gullet Pentti Pieski, Juho Keva, Inka Musta ja Heikki Mustonen.
Osloin ja Stockholmain
Lassin Oaivegávpotguovllu sápmelaččaid searvi háliida lasihit ovttasbarggu eará Suoma gávpotsámeservviiguin ja plánain lea ordnet oktasaš deaivvadeami Turku girjemeassuin golggotmánus. Maiddái oktavuođaid dahkan ránnjáriikkaid oaivegávpogiid sámeservviiguin lea dán jagi plánas.
“Jagi sápmelaš” -bálkkašumiin sávvet sii maid buoridit suopmelaččaid diđolašvuođa sápmelaččaid birra riikkaviidosaččat ja buktit sápmelašvuođa ovdan miehtemielalaččat. Searvvi kulturguovddáža čielggadan- ja plánenbarggus sápmelašvuođa čalmmustahttin lea ge okta guovddáš mihttomearri sis.
Buot sámiid searvi
Pieski muitala ahte mannan jagi leat sii maid bidjan deattu nuortalašdoaimmaide, ja dat lea buktán bohtosa.
– Oaivegávpotguovllu nuortalaččat leat doaibmagoahtán ja váldán searvvi iežaset oapmin. Dán jagi nuortalašdoaimmaid koordinereba Minna Moshnikoff ja Mari Korpimäki. Máŋgga jagi figgan oažžut anáraččaid doaimmaid johtui oaččui dál ođđa searaid, go stivrii ođđa lahttun válljejuvvon Inka Musta váldá doaimma badjelasas, cealká son.
