Dievdu oaččui láivásat duomu lágamánnerievttis.
Golggotmánus diibmá dubmehalai badjel 40-jahkásaš dievddu Nuorta-Finnmárkku diggegottis veagalváldán ja anašan vuollái 16-jahkásaš mánáin. Dievdu dubmehalai njealji jahkái giddagassii, ovtta jagi evttolaš giddagassii. Dasa lassin dubmehalai almmái máksit niidii 150.000 ruvnnu buhtadusa. Dievdu guoddalii duomu. Hålogalándda lágamánnirievtti ráŋggáštus lea láivásat, čállá Nordlys.
Čanai gitta ja veagalválddii
2009:s cirgguhii dievdu amfetamiinna vuolleahkásaš niidii, dan maŋŋel čanai son nieiddaža ja veagalválddii su seksualálaččat. Nieida lea čilgen dikkis ahte ii háliidan amfetamiinna, muhto ahte dievdu, gean son dovddai ovdalaččas, hálahii su geavahit mirkko. Son muitalii ahte gárremiin ii dovdan iežas báikkis, muhto son dattege muitá ahte dievdu illástii su seksualálaččat. Čilgehus deattuhuvvui sihke diggegottis ja lágamánnerievttis, muhto eai goappáge duopmárat oaivvil ahte niidii bidjui veagal amfetamiidna.
3 jahkái ja ovcci mánnui giddagassii
Lágamánneriekti lea láivudan ráŋggáštusa sivalašvuođagažaldaga, buhtadusmávssu ja ráŋggáštusáiggi guoddaleami vuođul. Lágamánnerievtti mielas lea ášši dutkojuvvon beare guhká. Veahkaváldi ii váidon politiijaide ovdal 2011:s, muhto dattege golihedje guokte jagi ja ovcci mánu ovdal dievdu áššáskuhttui. Hålogalándda lágamánneriekti dubme dievddu golmma jagi ja ovcci mánnui giddagassii. Jahki ja golbma mánu duomus leat evttolaš giddagassii, ja dasa lassin lea albmás golbma jagi geahččalanáigi. Dievdu ii dárbbaš máksit áššegoluid. Buhtadusmáksu bissu, go guoddaleapmi dán čuoggás gessojuvvui go lágamánneriekti gieđahalai ášši.
