Ávvir lea jearran iešguđet olbmuin Sámis mo sii ávvudit Sámi álbmotbeaivvi.
Saara Hermansson
– Go ávvudan Sámi álbmotbeaivvi, de láven coggat gávtti, ovttastallat olbmáiguin ja fulkkiiguin, ja borrat njálgga biepmu singuin. Dál orun Johkamohkis, ja de beasan maid leat mielde Johkamohkemárkaniin Sámi álbmotbeaivvi.
Berit Marie E. Eira
– Návuona sámi searvi ja giellaguovddáš leat mu bovden sin doaluide Buvrovutnii. Galggan doallat sártni doppe. Mu leat bovden danin go lean Johttisápmelaččaid listtu sámediggeáirras ja danin go Návuotna lea mu nubbi ruoktu gosa mii johtit ealuin geasset. Illudan hirbmadit ja hui mávssolaš go boazosápmelačča leat bovden.
Edel Marit Andersen
– Ávvudan Sámi álbmotbeaivvi ovttas Guovdageainnu olbmuiguin Báktehárjjis. Mu mielas lea fiinna čalmmustahttin go giliolbmot čoahkkanit. Somá go rávisolbmot ja mánát čoahkkanit.
Tiina Sanila Aikio
– Mis lea Anáris álbmotbeaivvi prográmma, man mielde oassálasttán levgemii, kultuvrralaš prográmmii, girkostallamii ja Sámedikki rabas uvssaid dilálašvuhtii.
Per Olof Nutti
– Mun ávvudan álbmotbeaivvi Johkamohkis, deaivvadan Ruoŧa Gonagaspárain ja báikegottiministariin.
Markus Thonshaugen
– Ávvudan Romssas, gos áhččán orru. Ávvudeapmi lea Storgata campingbáikkis, gos earret eará NRK:s lea sátta. Šaddá somá!
