-Almmuhus-
-Almmuhus-
OĐĐASAT Čiežas goddon terrorfalleheamis

Čiežas goddon terrorfalleheamis

-

-

Njeallje beaivvi ovdal válggaid dáhpáhuvai Englánddas fas terrorfalleheapmi. Golbma falleheaddji háhppehedje goddit čieža olbmo ja roasmmehuhttit badjel vihttalot olbmo, ovdal ieža goddojedje politiijaide.

Veahá badjelaš diibmu 22.00 lávvardat eahkeda ožžo Londona politiijat dieđu ahte muhtin vilges gálvobiilla lei vuodján vázzi olbmuid ala London Bridge alde, ovdal go jotkkii mátkki Borough Marketii, mii lea dasttán.

Doppe njuikejedje golbma albmá olggos biillas ja čuoggugohte niibbiiguin olbmuid geat ledje das lahka.

 

Politiijat ádjánedje 8 minuvtta

Stuorra politiijaveagat bohte jođánit báikái, gos báhče ja godde dan golbma falleheaddji.

Dalle ledje gollan gávcci minuvtta dan rájes go alárbma manai.

– Čiežas goddojedje falleheamis, lassin dan golbma falleheaddjái maid politiijat báhče ja godde, dieđihii Londona politiijameašttir Cressida Dick sotnabeai iđit.

 

Kaos

Kaosis mii čuožžulii Londona gávpotguovddážis, vuoruhedje politiijat olbmuid oažžut dorvui.

Olu ambulánssat sáddejuvvojedje báikái ja 48 olbmo dolvojuvvo viđa iešguđet buohccivissui, okta sis lei politiijabálvá guhte lei garrasit roasmmehuvvan.

Eará roasmmehuvvan olbmot ožžo ges vuosttašveahki muhtin hoteallas lahkosis, gosa ásahedje gaskaboddosaš vuostáiváldinbáiki roasmmehuvvan olbmuide.

 

Terror

Politiijat leat cealkán ahte dás lei sáhka terrorfalleheamis, muhto sotnabeaiiđit ii lean vuos oktage joavku dieđihan iežaset leat falleheami dahkan.

Dan golbma falleheaddji identitehtat eai ge leat vuos dovddusin dahkkon, čállá.

 

Goalmmát terrorfalleheapmi oanehis áiggis

Englánddas leat maŋimuš áiggiid leamaš máŋga terrorfalleheami.

Njukčamánu 22. beaivvi lei Londonis terrorfalleheapmi mas guđas goddojedje ja badjel 40 olbmo roasmmehuvve.

Miessemánu 22. beaivve goddojedje 22 olbmo ja 119 olbmo roasmmehuvve ges terrorfalleheamis, go muhtin almmái bávkalahtii bombba Manchester Arenas, gos Ariana Grande doalai konseartta.

Odne galgá muitokonsearta Manchester terrorfalleheami gillájeddjiid várás, dát konsearta čađahuvvo nu mo plánejuvvon, muhto čavgejit sihkkarvuođadoaimmaid vel eambbo.

Dán konseartta sáhttá oaidnit NRK neahttasiiddus ja NRK3:s diibmu 19.55 odne.

(©NTB)

 

 

- Advertisement -
-Almmuhus-