Njukčamánus dušše čieža olbmo Norgga johtolagas. Stuora vuodjenfievrrut leamaš seaguhuvvon badjel beali jápminlihkohisvuođain dán jagi.
Norgga johtolagas jápme čiežas njukčamánus, guovttis dain Davvi-Norggas.
Dat leat mealgat eanet go diibmá, seamma mánus 2018:s jápme guovttis Norgga johtolagas.
Dássážii leat 17 olbmo duššan johtolagas 2019:s, mii lea okta eanet go diibmá dán muttos áigge.
Badjel bealli
Stuora vuodjenfievrrut leamaš seaguhuvvon badjel beali jápminlihkohisvuođain dán jagi.
Dain lihkohisvuođain dušše 11 olbmo.
– Eat dieđe vel manin lihkohisvuođat dáhpáhuvve, muhto lea hirpmástuhtti go stuora vuodjenfievrrut leat seaguhuvvon nie olu jápminlihkohisvuođaide. Dán eat leat vásihan ovdal, dadjá Trygg Trafikk direktevra Jan Johansen preassadieđáhusas.
Lassánit
Norggas fievrridedje stuora vuodjinfievrrut birrasii 500 miljovnna tonna gálvvu 2013:s, dán einnostit lassánit 700 miljovnna tonnii 2040:s.
– Norgga johtolagas vudjet olu stuora vuodjenfievrrut ja dát bohtet lassánit. Čájehuvvo dávjá ahte ii leat stuora vuodjenfievrru vuoddji gii lea sivalaš lihkohisvuhtii, ja danin lea hui dehálaš ahte mii geat vuodjit smávva biillaiguin leat erenomáš várrogasat johtolagas, dadjá Johansen ja muittuha ahte Norggas leat olu seakka ja mohkás geainnut.
Maŋimuš vihtta jagi leat eanaš jápminlihkohisvuođat main stuora vuodjinfievrrut leamaš seaguhuvvon dáhpáhuvvan jagi vuosttaš áigodagas.
