Logut čájehit ahte gaskamearálaččat maŋemus viđa jagis leat gávccis duššan ođđajagemánus, dieđiha Trygg Trafikk.
Stáda geaidnodoaimmahat dieđiha ahte davimus fylkkain, Nordlánddas, Romssas ja Finnmárkkus, ii duššan oktage dán jagi ođđajagemánus.
– Lea surgat go mii álggahit jagi eambbo lihkisvuođaiguin go mannan jagi, ja dál mii fertet álgit bargagoahtit dainna ahte buoridit Norgga johtolatsihkarvuođa, lohká Trygg Trafikk direktevra Jan Johansen.
Golmmas dán čiežas ledje vázziolbmot, golmmáš biilavuoddjit ja okta lei biillas mielčuovvu.
– Stuorra oassi dain leat vázziolbmot, sihke vázziolbmot ja biilavuoddjit berrejit leat dihtomielalaččabut dál dálvet. Go leat vázzime, de it ábut leat sihkar ahte biilavuoddji oaidná du, joatká Johansen.
Ávžžuha deahkaid iskat
Ođđajagemánus lea leamaš gáibideaddji siivu ollu sajiin Norggas ja dálvi ii leat vuos lahka ge nohkame.
– Oallugat vudjet várálaš deahkaiguin, earret eará ahte minsttarčikŋodat lea beare vuollin, unnán áibmu deahkain dahje ahte deahkat leat biddjon boastut, nu ahte olbmot galget iskat deahkaid dávjá, ávžžuha son.
