Regiovdna Norrbotten dieđiha ahte koronanjoammumat lassánit leanas. Eanemusat njoammumat lassánit Johkamohkis ja Lulejus.
Disdaga ledje oktiibuot 19 ođđa koronanjoammuma Norrbottena leanas, dieđiha leana buohcceviessodoaimmahat Regiovdna Norrbotten.
Lulejus leat 16 ođđa njoammuma ja Johkamohkis fas čieža. Árjepluovves leat fas guokte ođđa koronanjoammuma. Haparandas ja Gironis lea goappeš gávpogis okta ođđa njoammun.
Jiellevári buohcceviessu ráhkkana váldit vuostá koronabuhcciid Johkamohkis maŋŋá go njoammun lassánii.
– Mii leat gulaskuddan leana njoammuneastadandoaktáriin ja maid Johkamohki gielddas dadjá Ola Wulf, Jiellevári buohcceviesu váldodoavttir ja medisiinnalaš hoavda P4 Norrbottenii.
Jiellevári buohcceviesus eai leat dikšon koronabuhcciid maŋemus mánu. Galledannjuolggadus čavgejuvvo dál dieđiha maid Wulf.
Eará gielddain Norrbottenis eai leat gávdnan ođđa koronanjoammumiid.
Dál leat golmmas buohcceviesus leanas koronadávdda dihte, muhto ii oktage intensiivadivššus.
39. vahkku válde 3356 koronaiskosa olles leanas. Oktiibuot 45 olbmos dieđihuvvui koronadávda dehe 1,3 proseantta ledje koronapositiivvat. 1757 olbmos lea oktiibuot dieđihuvvon korona Norrbottena leanas.
