– Dat lea mielahisvuohta, lohká kinohoavda Frank Bakkemo gean mielas orui jo jáhkkemeahttun go oinnii man ollugat leat geahččan «Den 12.mann» filmma Tromssas.
Dušše ovtta vahkkus šattai filbma dat eanemus gehččon filbma 2017s Aurora Fokus Kinos Tromssas, ja dasa lassin šattai juovlamánnu buot buoremus kinománnu goassege, čállá iTromsø.
Eanemus geasuhan gehččiid
Juovlamánu 25.beaivvi lei vuosttaš čájálmas filmmas Jan Baalsrud birra, ja filbma lei hirbmat geasuheaddji. Olbmot diŋgojedje bileahtaid ovdal go filbma čájehuvvui.
– Jurddaš go filbma «Den 12.mann» nagodii šaddat eanemus gehččon filbma dušše čieža beaivvis. Gaskamearálaččat leat gaskkal 1800 ja 1900 olbmo oaidnán filmma juohke beaivvi Tromssas, muitala kinohoavda iTromsii.
Miehtá riikka ledje 233 080 olbmo oaidnán filmma, ođđajagimánu 1.beaivvi logu mielde. Dušše Oslos leat eambbo olbmot oaidnán filmma go Tromssas.
Filbma čájehuvvo ain kinoin, ja ollislaš gehččiidlohku lassána ain beaivvis beaivái miehta riikka. Golmma vuosttaš beaivvi ođđajagimánus lei ollislašlohku lassánan 266 955 olbmui geat leat geahččan filmma kinos.
Guovdageainnus njeallje geardde
Diehtosiiddas lea kinufilbma čájehuvvon njeallje geardde, ja oktiibuot leat 637 geahčči oaidnán filmma Guovdageainnu kinus.
