Porsáŋggu gielda sihtá olbmuid erremii mannat jus leat fitnan Hámmárfeastta buohcceviesus maŋŋá golggotmánu 8. beaivvi.
Gielda čujuha covid-19 njoammunleavvamii mii lea Hámmárfeasta buohcceviesus, ja dálá njoammuguorramii man buohcceviessu lea johtui bidjan. Maŋimuš beivviid lea duođaštuvvon máŋga buohcceviessobargái njommon korona, ja buohcceviessu lea gidden stuorra oasi buohcceviesus, čállá Porsáŋggu gielda preassadieđáhusas.
Váldet iskosa
Dassái go buohcceviesu njoammunviidodat lea čielgaduvvon, de gohčču Porsáŋggu gielda iežas ássiid, geat leat leamaš buohcceviesus maŋŋá golggotmánu 4. beaivi, váldit oktavuođa telefovnna bokte báikkálaš doavtterkantuvrrain. Ávžžuhus boahtá várrugas-prinsihpa vuođul vai gielda oažžu oppalaš gova potensiála ássiin geaidda sáhttá dávda njommon.
Erremii mannat
Ássit, geat leat leamaš Hámmárfeastta buohcceviesus maŋŋá golggotmánu 8. beaivvi fas ožžot gohččuma logi beaivái erremii mannat maŋŋá iskosa dahje olggosčáliheami, dahje jus iskkus ii leat vuos čájehan negatiiva bohtosa. Dat guoská maiddái gussiide. Jus leat symptomat mat leat čadnon covid-19:i, de berre šiehtadit iskkusdiimmu alcces. Doavtterstašuvdna lea rabas gaskal 08 ja 15 árgabeivviid.
