Dál leat vuosttaš čiekčamat dán jagá Nilut Cupas čikčon. Vaikko čiekčamiid nuoramusat vuoittahalle vuosttaš kámppa, de eai leat vuollanan.
Olgun lea buolaš, ja olbmot dievvagohtet Báktehárjái. Dalle lea sihkkaris mearka ahte Nilut Cup lea álgan.
Vuosttaš čiekčan čikčon
Nissonjoavkkut Best på benken ja Team Rehab álggahedje meassuid, ja čikče vuosttaš čiekčama. Sara Beate Eira Persson (Team Rehab) náhkehii čiekčama áidna moala, ja nu sii vuite iežaset vuosttaš čiekčama.
Eai leat beahtahallan
Best på benken, geat leat nuoramusat dán jagá Nilut Cupas, deaivvadedje buriin joavkkuin, eai ge birgen.
– Lei suddu go ribaheimmet dan ovtta moala, ja nu vuoittahalaimet, dadjá joavkojođiheaddji ja čiekči, Nina Vars. Vaikko Vars ii leat áibbas duhtavaš go vuoittahalle, de son vállje geahččat ovddosguvlui ja dadjá ná:
– Mii eat lonohallan doarvai dávja, ja danne váibbaimet, eat ge nagodan šat viehkat. Dan fertet buoridit boahtte kámppai.
Vuosttaš geardde Nilut Cupas
Elina Johansen Ijäs (15) searva vuosttaš geardde Nilut Cupai. Son lea ilus go sis lei vuosttaš čiekčan.
– Lean ilus go mis lei vuosttaš čiekčan. Dalle eai lean vel háhppehan nu olu olbmot boahtit geahččat. Olu geahččit dat baldet, boagusta son.
