-Almmuhus-
-Almmuhus-
KULTUVRAČevllohallet ođđa buktagiiguin 

Čevllohallet ođđa buktagiiguin 

-

-

Bearjadaga almmuhii Riddu Riđđu dán jagáš prográmma, ja festivála bealis čevllohallet sisdoaluin. Festiválaguossit besset earret eará vásihit Mari Boine áibbas ođđa hámis, sii ožžot erenomáš musihkkavásáhusa go guhtta eamiálbmotráppára lávkejit seamma lávdái ja logi nuorra duojára govahallet boahtteáiggi.  

Riikkaidgaskasaš álgoálbmotfestivála Riddu Riđđu lágiduvvo 27. gearddi suoidnemánu 12. beaivvis 15. beaivái.

Festivála lea masá álggu rájes diŋgon ja ráhkadan dáiddalaš buktagiid festiválagussiid várás.


Riddu Riđu festiválajođiheaddji Karoline Trollvik lea rámis dán jagi prográmmain ja dadjá iežaset leamaš gudneáŋgirin. Son jođiha iežas maŋimuš festivála. Govven: Kila Anti 

– Mis lea gudneáŋgiris prográmma ja leat diŋgon máŋga buktaga dán jagi festiválii. Lean hirbmat rámis ja illudan sakka dassážii go deaivvadit Olmmáivákkis gos ovdanbuktit festiválaprográmma, dadjá festiválajođiheaddji Karoline Trollvik. 

 

 

Mari Boine ođđa hámis

Mari Boine ovdanbuktá konseartta Riddu Riđu váldolávddis lávvardaga, muhto su besset festiválaguossit vásihit áibbas ođđa hámis.

Festivála ovttasbargoguoibmi UiT Norgga árktalaš universitehta buvttada oainnat musihkkačájálmasa mas oahpásmuvvat Mari Boine lávlagiid duogážii. 

– Mari Boines leat olu lávlagat main leamaš ja lea stuora mearkkašupmi Sámi servodatovdáneapmái. Ođđa musihkkačájálmasas muitala son lávlagiid duogážiid birra. Mari Boine illuda dasa ja lea gearggus bargat juoidá áibbas ođđa, dadjá UiT prošeaktajođiheaddji Inger Elin Utsi. 


UiT Norgga arktálaš universitehta prošeaktajođiheaddji Inger Elin Utsi muitala preassakonferánssas Mari Boine erenomáš musihkkačájálmasa birra mii čájehuvvo Riddu Riđđu festiválas. Govven: Kila Anti 

Mari Boine šaddá UiT gudnedoavttirin čakčat ja universitehta deavdá 50 jagi, dan oktavuođas buvttaduvvo čájálmas. Riddu Riđu festiválajođiheaddji illuda dasa. 

– Mari Boine lea Sámi dronnet ja addá áibbas erenomáš konseartavásáhusa. Illudan maiddái oaidnit musihkkačájálmasa. Dát čájehuvvo guktii ja goabbat ge čájálmassii vuovdit 120 bileahta. Ávžžuhan olbmuid farggamusat háhkat saji jus háliidit dán vásihit, dadjá Karoline Trollvik. 

 

 

Álgoálbmot ráppárat seamma lávddis

Nubbi dáiddalaš buvttadeapmi lea Circumpolar Hip Hop Collab. 

– Guhtta eamiálbmotráppára ovttasbarget ja ráhkadit ođđa musihka. Sii loahpahit Riddu Riđu lávvardatija ja konsearttas čalmmustahttet eamiálbmotgielaid ja fáttáid, dadjá Trollvik. 

Musihkkalávddis besset olbmot maiddái vásihit Baker Boy, DJ Shub, Amanda Delara, Resirkulert, Biru Baby, Wimme & Rinne, Solju, Felgen Orkester ja Tyva Kyzy konsearttaid.

 


Riddu Riđđu lea riikkaidgaskasaš álgoálbmotfestivála mii lágiduvvo 27. gearddi. Preassagovva: Daniel Skog

 

Boahtte áigge duodji

Dán jagi festiválas dáhttot čalmmustahttit duoji.

Logi nuorra dáiddára leat buvttadan «Duodji Dreamers» čájáhusa. 

– Nuorra duojárat čájehit dujiideaset ja reflekterejit duoji mearkkašumi dálá ja boahtteáiggi servodahkii, čilge festiválajođiheaddji.

Duodječájáhusas leat 20 duoji maid beassá oaidnit Davvi álbmogiid guovddážis. 

 

Čalmmustahttet nuorra dáiddáriid 


Dán jagi nuorra dáiddár lea Ánná Káisá Partapuoli. Son lea slam-poehta. Go Riddu Riđđu almmuhii prográmmas, de nuorra dáiddár ovdanbuvttii divtta sisabahkkemiid birra mat goaridit boazodoalu. Govven: Kila Anti 

Riddu Riđđui lea dehálaš čalmmustahttit nuorra dáiddáriid.

Riddu-seassonis ovdanbuktá Ánna-Katri Helander hiphop-dánsunčájálmasa «aindás». Son lea maŋimuš jagi ovttasbargan Sámi ja Ođđa-Selándda musihkka- ja filbmadáiddáriin ráhkadan dihtii čájálmasa mas lea politihkalaš sáttasátni. 

Dán jagi nuorra dáiddár lea Ánná Káisá Partapuoli.

Son lea slam-poehta, dat mearkkaša ahte čállá divttaid maid galgá ovdanbuktit njálmmálaččat. Sus lea ritma ja geavaha olu riimma lávddis.  

– Lea hui suohtas ja lean hui ilus go oaččun dán vejolašvuođa. Dál beasan vuosehit iežan dáidaga ja beaggit. Mun čálán sámegillii ja dalle lea maid lunddolaš čállit sámevuođa birra. Mun čálán Sámi eallima birra, divttat leat Sámi ealáhusaid, boazodoalu, sisabahkkemiid, politihka, ráhkisvuođa ja festiválaeallima birra, muitala son. 

 

Dehálaš kulturlágideapmi 

Riddu Riđđu festivála lea buohkaid várás ja prográmma lea danin viiddis. Bearjadaga almmuhedje dán Romssa universitehtas.

Norgga kulturministtar Trine Skei Grande galgá rahpat festivála. 

– Dat han signalisere ahte Riddu Riđđu lea okta Norgga deháleamos kulturdoaluin. Dan dohkkeheami dárbbašit ja ánssášit. Lea somá go kulturministtar boahtá ja čuovvu festivála olles duorastaga. Mun illudan sutnje čájehit man láhkai lágidit festivála, dadjá Trollvik. 

 

Maŋimuš festivála

Festiválajođiheaddji Karoline Trollvik lágida iežas maŋimuš Riddu Riđu.

Čakčamánus váldá Sandra Márjá West badjelasas doaimma. 

– Mun jáhkán ahte mus boahtá leat buorre ja njuorrasmahtti dovdu olles festivála. Mun lean šaddan nu buorre Riddu-bearrašii ja lean hui rámis go lean beassan ovttasbargat čeahpes dáiddáriiguin. Mun illudan Sandra Márjjá láidestit festiválajođiheaddji doibmii. Lean ilus go Riddu Riđđu oažžu nu buori jođiheaddji. Mus galgá leat hávski ja áiggun návddašit dán geasi Riddu Riđu, dadjá son. 

 

Erenomáš mearkkašupmi 

Maiddái Riddu Riđu ođđa buvttadeaddji Alice Jektevik lea gealdagasas ovdal festivála. Son álggii bargui juovlamánus ja dadjá ahte leamaš hušaš jahkebealli. 


Riddu Riđu buvttadeaddji Alice Jektevik dadjá ahte leamaš hušša, muhto somá bordit dán jagi festiválaprográmma. Govven: Kila Anti 

– Leamaš hástaleaddji, muhto máilmmi somá bargat buvttadeaddjin dássážii. Mii fállat nana buori prográmma ja háliidit čalmmustahttit ja ovddidit álgoálbmogiid kultuvrraid, lohká son. 

Alice Jektevik lea mátta-romsalaš ja muitala ahte festiválas leamaš stuora mearkkašupmi sutnje. 

– Mun ledjen Riddu Riđus vuohččan 2014:s, sullii seamma áigge go oahpásmuvvagohten iežan sámi duogážii. Jagi maŋŋel ledjen eaktodáhtolažžan festiválas ja diibmá ledjen Riddu-bargi. Dál lean buvttadeaddji. Riddu Riđus lea stuora mearkkašupmi munnje ja dán doaimmas oahpan ođđa áššiid juohke beaivvi, lohká son. 

 

-Almmuhus-