Kárášjogas lea ilbman ođđa lista gielddaválggaide, Dáloniid lista, sii háliidit geahččat ovddos ja oažžut gielddapolitihka julggiid ala.
Kárášjogas lea ilbman ođđa lista gielddaválggaide, Dáloniid lista, sii háliidit geahččat ovddos ja oažžut gielddapolitihka julggiid ala.
Dáloniid lista sátnejođiheaddji evttohas Åshild Joks Andresen lea gearggus čavčča válggaide, ja lohká jus kárášjohkalaččat leat gearggus ođđa stivrejupmái de lea son ge gearggus čohkkedit sátnejođiheaddji stullui.
– Jus Kárášjoga álbmot lea gearggus ođđa sátnejođiheaddjái, de áinnas. Min ulbmil lea ovddos guvlui geahččat, eat geavat áiggi dasa mii lea dáhpáhuvvan ovdal, lohká son.
– Mu váibmoáššit leat dieđusge mánáidgárddit, skuvla ja dearvvašvuohta. Sámi buohccit galget dovdat oadjebasvuođa ja beassat gulahallat dearvvašvuođabargiiguin. Giella lea ášši mii guoská buot áššiide, jus ii leat giella de lea maid váttis kultuvrra fievrridit, dadjá Dáloniid lista sátnejođiheaddji evttohas.
Dearvvašlaš
Åshild Joks Andresen lohká iežaset ođđa lista ceggen go oidne dárbbu ođasmahttit gieldda.
– Mii oaidnit mo dát áigodat leamašan, ja gávnnaheimmet cegget ođđa lista, lohká son. Son čujuha maiddái gielddastivrra moivviide mat leat beaggán maŋemuš njeallje jagi.
Åshild Joks Andresen deattuha Dáloniid lista ii leat áiddo ásahuvvon lista, muhto Kárášjoga válggaid oktavuođas. Sis lea sámedikkis áirras, Isak Mathis O. Hætta ávjovárreválgabirrasis.
– Olbmot leamašan dieđusge veaháš eahpesihkkarat ođđa listui, ja gažadan manin nu ges, dasa lean vástidan manin ii. Jáhkán lea dearvvašlaš ahte bohtet ođđa listat ja olbmuin lea buoret válljen várri, lohká Andresen.
Boazodoallu ii oidnosis prográmmas
Ávvir jearrá áigu go Dáloniid lista vuoruhit boazodoalloáššiid, dasa vástida sátnejođiheaddji evttohas ná:
– Boazodoalus lea iežaset organisašuvdna, ja fertet dieđusge singuin ovttasbargat. Muhto eat mii boađe boazodoallopolitihka vuoruhit go ii leat mis dat máhttu. Boazodoaluin fertet ovttasbargat, eat sáhte daid hilgut, muhto dat ii boađe oidnosis nu čielgasit min prográmmas, dadjá Åshild Joks Andresen, ja lasiha boazodoalus lea maid sierra lista.
Åshild Joks Andresen lea ovddeš Árja miellahttu ja lea dán áigodagas politihkken Árjas. Árja ii cegge lista čakčii Kárášjoga gielddaválggaide.
Dát ášši lea vuosttaš geardde deaddiluvvon Ávvir báberáviissas cuoŋománu 11. beaivvi.
