Stáhta luoddadoaimmahat háliida cegget gaskaboddosaš šalddi Báttárjoga badjel, buhtadussan šaldái mii billašuvai dulvvi dihte.
Ikte eahkes dieđihuvvui ahte E6-šalddis, mii manná dulvan joga badjel Báttáris Davvi-Romssas, leat kritihkalaš konstrukšuvdnaváttut. Stáhta luoddadoaimmahaga šaldeekspearttat leat mearridan ahte šalddi konstrukšuvnnalašváttut leat nu vearrái ahte eai sáhte divvut.
Dassá gaskaboddosaš šaldi lea ceggejuvvon, fertejit johtaleaddjit vuodjit Suoma čađa.
Ceggejit ođđa šalddi
Stáhta luoddadoaimmahat cegge ođđa šalddi, mii galgá leat gárvvis moatti vahkku geahčen.
– Stáhta luoddadoaimmahagas leat gearggusvuođašalddit vuorkkás, muhto ádjána aŋkke sullii guokte vahkku fievrridit ja cegget šalddi, dadjá Stáhta luoddadoaimmahaga šaldehálddašeaddji, Frode Lyng Hansen, preassadieđáhusas.
Eai sáhte divvut
Frode Lyng Hansen lea árvvoštallan šalddi.
– Konstrukšuvdnaváttut leat nu duođalačča ahte šalddi ii sáhte divodit. Mii árvvoštallat dál galgat go diktit šalddi oalát billašuvvat vai galgat go ieža gaikkodit, dadjá šaldehálddašeaddji preassadieđáhusas.
Ođasmahtton johtolatdieđut bohtet dađistaga 175.no neahttasiidui.
