Jåhkågaskka čearru oaivvilda fertet buoret áiggi oažžut ráhkkanit gulaskuddančoahkkimii.
Jokkmokk Iron Mines AB lea gohččon Jåhkågaskka, Sirges ja Tuorpun čearuid gulaskuddančoahkkimii gos fitnodat áigu muitalit ruvkeplánaid birra. Ruvkefitnodat áigu earret eará čájehit makkár plánat sis leat čáhceiskosiid bovrema, jietna- ja áibmomihtádusaid ja luondduárvvu luvvodagaid ektui mat galget čađahuvvot 2022:s ja 2023:s.
Jåhkågaskka čearu ságadoalli Jon-Mikko Länta lohká SVT Sameradioi ahte čearru ii oassálastte čoahkkimii ja ahte čearru lea mearridan bivdit ođđa gulaskuddančoahkkima ruvkefitnodagain ođđajagemánus. Ságadoalli oaivvilda ahte bovdehus gulaskuddančoahkkimii lea boahtán beare oanehis áiggis ja ahte čearru dárbbaša eambbo áiggi ráhkkanit dakkár čoahkkimii.
Gulaskuddančoahkkimat maid ruvkefitnodat doallá čearuiguin lea okta dain guoktenuppelohkái eavttuin maid Ruoŧa ráđđehus gáibidii dan oktavuođas go adde konsešuvdnalobi Gállogis mannan giđa.
