-Almmuhus-
-Almmuhus-
-Almmuhus-
OĐĐASATCealkán eret direktevra­virggi

Cealkán eret direktevra­virggi

-

-

Eva Håheim Pedersen dieđiha stivrii ahte áiggošii luohpat hálddašeaddji direktevran Finnmárkku buohcciviesus.

– Lean dieđihan stivrrajođiheaddjái ahte háliidan mannat ealáhahkii geassái. Lea áigi juohke áššái. Deavddán  66 jagi dán čavčča, ja dál háliidan bargat juoga eará. Lea hástaleaddji jahki leamaš, muhto hirbmat gelddolaš ja jahki lea addán olu. Lean loaktán barggus eará čeahpes ja áŋgiris mielbargiiguin Finnmárkku buohcciviesus, lohká Eva Håheim Pedersen preassadieđáhusas maid Finnmárkku buohcciviessu lea almmuhan disdaga.

Son lea leamaš hálddašeaddji direktevran Finnmárkku buohcciviesus gávcci jagi, guovtti áigodagas mat leat 2007:s 2010:i rádjái, ja 2016:i rájes geasi rádjái.

Rámiida barggu

Stivrrajođiheaddji Harald O. Larssen šálloša go Eva Håheim Pedersen háliida luohpat, muhto lohká stivrra geahčadit ášši, ja ahte ráhkkanišgohtet gávdnat ođđa hálddašeaddji direktevrra.

– Livččen háliidan su joatkit hálddašeaddji direktevran Finnmárkku buohcciviesus, muhto ipmirdan su mearrádusa, ja lean ilus go son árrat dieđiha dan. Lea stuora bargu dahkkon daid jagiid go lea leamašan direktevran, ja háliidan giitit su barggu ovddas, lohká stivrrajođiheaddji.

Olu ođđa visttit ja klinihkat

– Finnmárkkus leat ođđa buohcciviesuid rahpan Girkonjárggas, Álttás ja aiddobáliid maid Kárášjogas, ja mii leat maid ásahan ođđa klinihkaid, gáiddus dearvvašvuođabálvalusaid, álbmogii, ja viimmat lea maid mearrádus hukset ođđa buohcciviesu Hámmárfestii Oarje-Finnmárkui. Seammás go dat leat dáhpáhuvvan, de leat doalahan fokusa dábálaš doaimmaide ja ovdánahttit bálvalusaid, nu ahte lea dahkkon hirbmat buorre bargu direktevrras ja su bargoveagas dáid jagiid, lohká Harald O. Larssen.

Eva Håheim Pedersen doaibmá virggis gitta geassemánu 2020 rádjái dieđiha Finnmárkku buohcciviessu preassadieđáhusas.

-Almmuhus-