-Almmuhus-
-Almmuhus-
-Almmuhus-
OĐĐASATCavgileapmi almmustahtii lobihis bivddu

Cavgileapmi almmustahtii lobihis bivddu

-

-

Olbmuid cavgileapmi dagahii ahte njeallje romsalačča gávnnahalle bivdime lobiheamit Láhpi sullos Láhpi gielddas. Bivdiin ii lean bivdokoarta, eaige lean máksán bivdidivada ge.

Finnmárkkuopmodat dieđiha preassadieđáhusa bokte ahte njeallje bivdi gávnnahalle lobiheamet bivdime Láhpi sullos.

– Bivdu eananeaiggáda lobi haga hedjonahttá vejolašvuođa gáhttet fuođđovalljodagaid ja čađahit smávvafuođđohálddašeami mii lea vuođđuduvvon gelbbolašvuhtii. Láhpi suolu lea okta unnimus bivdoguovlluin guđain njealjádaskilomehteriin. Lobihis bivdu billista almmolašvuođa ovdii ja lea dasa lassin rihkolaš, lohká meahci jođiheaddji FeFo:s, Einar J. Asbjørnsen dadjaleamis.

 

Váldet duođaš cavgilemiid

Dilli váidojuvvo dál.

– Mii lea ilus go oažžut cavgilemiid. Dat veahkeha dahkat goziheami vel beaktileabbon. Seammás oažžut buoret vejolašvuođa reageret go eananeaiggáda bivdo- ja guolástanmearrádusaid dahje eará lágat rihkkojuvvojit, joatká Asbjørnsen.

– Jotket ain sáddet cavgilemiid, de mii čuovvolit daid, lea su ávžžuhus.

 

Stuora oassi čuvvot lága

Stáhta Luonddubearráigeahčču, Boazopolitiijat ja FeFo čađahit dáid beivviid oktasaš bivdobearráigeahču miehtá Finnmárkku. Sihke helikopter, biila ja fanas geavahuvvojit goziheamis. Lea vuosttažettiin bivddu čađaheapmi ja mohtorjohtolat meahcis mii dárkkistuvvo.

– Lihkus ii ovddas dárkkisteapmi Láhpi sullos Finnmárkkuopmodaga muđui. Váldovásáhus orru leame ahte eanas bivdit dihtet njuolggadusaid ja buot lea nu go galgá. Ikte dárkkisteimmet 14 bivdi siskkit guovlluin, gos buot ealgabivdiin ja rievssatbivdiin ledje báhpirat ortnegis ja ledje rievttes bivdoguovllus, loahpaha Asbjørnsen preassadieđáhusas.

Dán rádjái leat dárkkistan sullii 40 bivdi iešguđet báikkiin Finnmárkkuopmodagas. Dárkkisteapmi jotkojuvvo čavčča mielde, dieđiha Finnmárkkuopmodat FeFo preassadieđáhusas.

 

 

 

-Almmuhus-