Stuorát uđasvárra Romssas dagaha ahte politiijat ja eará etáhtat čavgejit gearggusvuođadoaimmaid. Máŋgga sajis lea várradássi badjánan njelježii, mii lea nubbin alimus dássi.
Stuorát uđasvárra Romssas dagaha ahte politiijat ja eará etáhtat čavgejit gearggusvuođadoaimmaid. Máŋgga sajis lea várradássi badjánan njelježii, mii lea nubbin alimus dássi.
NRK čállá ahte geainnut soitet giddejuvvot fáhkka ja ahte olbmot, geat ásset dakkár báikkiin gos uđas sáhttá fierrat, soitet evakuerejuvvot.
Uđasvarra Tromssas
Norgga čázádat- ja energiijadirektoráhtta (NVE) lea máŋgga sadjái bidjan uđasváradási njelježii, mii mearkkaša ahte lea stuorra várra ahte uđđasat sáhttet fierrat.
Dát guoská Mátta-Romsii, Sis-Romsii, Romssa gávpogii, Ufuohtii ja Ivgui.
NVE dieđuid mielde dagahit lieggasat temperatuvra, biegga ja arvi dahje šlahtti njázu, man geažil sáhttet uđđasat fierrat.
Uđasvárra lea garraseamos riddoguovlluin, go doppe bieggá ja njázuda eanemus.
Gitta geainnut
Olggut Sáččás giddejedje Mefjordgeainnu vuossárgga eahkedis. Dápmotvuovddegeaidnu Sis-Romssas lea maid giddejuvvon uđasvára geažil.
Finnmárkkus lea E69 geaidnu gaskal Skártavági ja Davvinjárgga maid gitta, dat ges dálkki geažil.
Okta duššan
Dássážii lea dán dálvvi okta olmmoš duššan muohtauđđasii.
Dat lei itálialaš čuoigi, guhte váldui uđđasii Ivgus, njukčamánu gaskkamuttus.
Loahpageahčen njukčamánu fierai maid uđas E8 geainnu ala Lávvavuovddis, dalle gárte golbma biilla dan vuollái muhto ii oktage roasmmehuvvan dáhpáhusas.
(©NTB)
