Guolástanministtar lea mearridan rievdadit turistaguolásteddjiid njuolggadusaid, mat doaibmagohtet ođđajagimánu vuosttaš beaivvi rájes.
– Deháleamos rievdadus lea ahte guolásteaddji sáhttá váldit guliid mielde riikkas dušše jus lea bivdán báikkis mii lea registrerejuvvon turistaguolástanfitnodahkan. Dán sávan leat mielde nanneme dan duođalaš beali turistaguolástanealáhusas, lohká guolástanministtar Odd Emil Ingebrigtsen.
Doaimmahanbivdomearri vuoliduvvo 20 kilos 18 kiloi, ja eanemusat sáhttá juohke olmmoš guovtte geardde jahkái doalvut guliid olggos riikkas. Dát lea mearkkašahtti gáržžideapmi otná njuolggadusčállosa ektui, go dál lea lohpi oktii vahkkui doalvut guliid olggos riikkas.
Čavgejit dieđihannjuolggadusaid
Viidáset rievdaduvvot bivdosálašdieđihannjuolggadusat. Turistaguolástanfitnodagaid dieđihangeatnegasvuohta čielgá eambbo, ja biddjo gáibádus digitála bivdoboađusrapporteremii mii doaibmagoahtá 2021 loahpageahčen. Láhččojuvvo maid garrasit njuolggaduspraktiseremii ja garrasit ráŋggáštusaide jus njuolggadusat rihkkojuvvot – nu go garrasit ráŋggáštus sidjiide geat rihkkot daid ođđa njuolggadusaid dahje ahte sihkkojuvvot eret turistaguolástanregistaris.
– Mun áiggun ain gulahallat ealáhusain dan birra makkár eavttut berrejit biddjot daidda geat leat registrerejuvvon turistaguolástanregistarii, ja áiggun maid váldit ovdan gažaldaga maid fitnodagat galget dahkat bázahusaiguin maŋŋel go leat čollen guliid, dainna lágiin ahte galget boahtit atnui. Mii áigut maid, gulahallama čađa fitnodagaiguin, geahčadit ahte lea go vejolaš bidjat beaivekvohta dahje earálágan muddemiid aktivitehtadási ektui, lohká Ingebrigtsen.
Njuolggadusčállaga rievdadusat bohtet maŋŋel go gulaskuddančálus mas olu evttohusat leat oassin, lea leamašan gulaskuddamis.
