Beaivváš Sámi Našunálateáhtera ja Sámi joatkkaskuvlla ja boazodoalloskuvlla visti lea dát čavddis. Árbevieru mielde ávvudedje huksensajis ahte rohpi lea sajis. Visti galgá leat gárvvis boahtte jagi dán muttus áiggi.
Statsbygg gulahallanneavvu Gjermund Jappée dieđiha preassadieđáhusas ahte huksema oktavuođas lea čavddis rohpi olahus ja ávvudanveara. Kulturdepartemeanta ja Máhttodepartemeanta attii Statsbyggii bargun čohkket oktii teáhtera ja joatkkaskuvlla. Bargosoahpamuš Econor entrpenørain vuolláičállui ja arkiteavttat leat Snøhetta, 70 grader N ja dáiddár ja arkiteakta Joar Nango. Visti galgá leat gárvvis 2024 miessemánus.
– Huksenbargu ovdána plána mielde ja mii illudat joatkit dan buori ovttasbarggu dassái go geargat bargguin, lohká prošeaktajođiheaddji Marte Kollstrøm.
Jagi geahčen galgá leat Beaivváš Sámi Našunálateáhtera ja Sámi joatkkaskuvlla ja boazodoalloskuvlla oktasaš visti gárvvis. Sihke skuvllas ja teáhteris leamaš guhká dárbu ođđa vistái ja go dát gárvána, de lea mielde loktemin sámegiela, kultuvrra ja árbevieruid.
Ođđa visttis leat golbma ossodaga ja olbmot čoahkkanit oktasaš boradanlatnjii, váldofeaskárii ja váldouksii. Visti huksejuvvo eanaš muoras ja lea birrasii 7300 njealjehasmehtera guovtti gearddis oktiibuot. Das lea stuorra teáhtersále ja smávit sále. Skuvlla oasis lea lášmmohallansále, bargobájit, stuorra kievkkan, oahpahuslanjat ja hálddahuslanjat. Ođđa visti lea dálkádatusttlaš go dat lea huksejuvvo nu gohčoduvvon passiivavistin mas leat olu dálkkádatustitlaš doaimmat.
